पोखराका मेयरको घोषणा : ३ महिनाभित्र १ घर १ वृक्षरोपण

आदर्श समाज सम्वाददाता
जेठ २३, २०७९
dhan raj ach

पोखरा । पोखरा महानगरपालिकाले ३ महिनाभित्र महानगरका सबै घर कम्पाउन्डमा बिरुवा रोप्न नगरवासीलाई अनिवार्य गरेको छ । महानगरका मेयर धनराज अचार्यले अबको ३ महिनाभित्र प्रत्येक घरमा बिरुवा रोप्ने घोषणा गरे । विश्व वातावरण दिवसको सन्दर्भ पारेर उनले यस्तो घोषणा गरेका हुन् ।

आइतबार ५० औं विश्व वातावरण दिवसको अवसरमा महानगरपालिकाले आयोजना गरेको वृक्षरोपण कार्यक्रमलाई सम्बोधन गर्दै उनले १ घर १ वृक्षरोपण कार्यक्रमका लागि महानगरले नै आवश्यक बिरुवा उपलब्ध गराउनेसमेत जानकारी दिए । त्यसका लागि वातावरण शाखाले तयारी अगाडि बढाउने उनले बताएका छन् ।

केही वर्ष अगाडि सेती नदीमा आएको अप्रत्यासित बाढी, गतवर्ष मनाङ र मादीमा आएको बाढीको स्मरण गर्दै उनले वातावरणीय सन्तुलन कायम गर्न वृक्षरोपण अनिवार्य रहेको धारणा राखे । उनले सानो क्षेत्रफलमा बनेका घरमा समेत अक्सिजन दिनेखालका सानातिना बिरुवा भए पनि रोप्न नगरवासीलाई आग्रह गरेका छन् ।

पोखरामा विगतमा प्रशस्त मात्रामा रहेका पोखरी, चौतारा र वरपीपल मासिएका उल्लेख गर्दै उनले सडकका किनारामा कस्तो बिरुवा रोप्ने भन्ने विषयमा सरोकारवाला पक्षसँग बसेर निष्कर्षमा पुगिने बताए । ‘विगतमा पोखरामा प्रशस्त पोखरीहरु थिए । चौताराहरु थिए । प्रशस्त वर पीपलका रुखहरु थिए, ती सबै मासिए ।’ उनले भने, ‘अब जे जति जोगिएको छ, त्यसको संरक्षण गर्ने र सडक छेउमा कस्ता उपयोगी बिरुवा रोप्ने भन्ने विषयमा सरोकारवाला विज्ञसँग बसेर निर्णय गर्ने छौं । अनि पोखरालाई नाराअनुसारको स्वच्छ हराभरा सुन्दर पोखरा व्यवहारमै बनाउने छौं ।’

विगतमा पोखरामा प्रशस्त पोखरी, चौतारा, प्रशस्त वर पीपलका रुखहरु थिए, ती सबै मासिए

मेयर आचार्यले खाली जमिनमा वृक्षरोपण कार्यक्रम गर्न पोखरास्थित सम्पूर्ण संघसंस्थालाई आग्रहसमेत गरेका छन् । वृक्षरोपणका लागि वृक्षरोपणमात्र नभएर त्यसको संरक्षण हुनुपर्नेमा जोड दिँदै उनले आफूले रोपेका बिरुवाको संरक्षण पनि सम्बन्धित संस्थाले नै गर्नुपर्ने बताए । सरकारले निजी जमिनमा रोपिएका रुख कटानको सन्दर्भमा लिएको निर्णयले आम नागरिकलाई आम्दानी दिने बिरुवा रोपेर आयअर्जन गर्ने बाटो खोलिदिएको धारणा राख्दै उनले वृक्षरोपण गरेर यसको फाइदा लिनसमेत आग्रह गरेका छन् ।

मेयर आचार्यले पोखरा २४ मा रहेको ठूली पोखरी (कश्यप ताल) को संरक्षणका लागि महानगरको तर्फबाट समेत योगदान रहने बताए । वडाको समग्र विकासका लागि वडाध्यक्ष र निर्वाचित जनप्रतिनिधिसँग बसेरै योजना बनाउने उनले आश्वासन दिए ।

महानगरले आयोजना गरेको वृक्षरोपण कार्यक्रममा मेयर आचार्य, प्रमुख प्रशासकीय अधिकृत बलराम रिज्यालसहित जनप्रतिनिधि, महानगरका कर्मचारी र स्थानीहरुको सहभागिता थियो ।

पोखरा २४ को कार्यालय र कश्यप ताल परिसरमा विश्व वातावरण दिवसको अवसर पारेर वृक्षरोपण गरिएको हो । वडा नम्बर २४ का वडाध्यक्ष भरतबहादुर अधिकारीका अनुसार विभिन्न प्रजातिका २ सयभन्दा धेरै बिरुवा रोपिएको छ ।
कार्यक्रममा वडाध्यक्ष अधिकारीले अहिले वडावासी दाजुभाइ दिदीबहिनी डोकोमा गाग्री बोकेर कहाँ पानी पाइन्छ भनेर धाउनुपर्ने अवस्था रहेको जानकारी दिए । यसको अन्त्यका लागि लिफ्टिङ खानेपानी आयोजना छिट्टै सम्पन्न गरेर नगरवासीलाई खानेपानी उपलब्ध गराउने काममा आफूहरु लागिपर्ने बताए ।

Related News

सम्बन्धित समाचार

  • इपिएसबारे सचेतनामूलक कार्यक्रम

    आदर्श समाज सम्वाददाता वैशाख १, २०८१
    पोखरा । वैदेशिक रोजगार विभाग (इपिएस) कोरिया शाखा आयोजनामा पोखरामा जनप्रतिनिधि, कर्मचारी, स्वास्थ्य स्वयंसेविका र कोरियामा रहेका ब्यक्तिका परिवारसँग अन्तक्र्रिया…
  • किशोरीका लागि सीपमूलक शिक्षा

    आदर्श समाज सम्वाददाता वैशाख १, २०८१
    पोखरा । पोखरा २९ भण्डारढिकमा रहेको दीपशिखा सामुदायिक पुस्तकालय तथा दीपशिखा बहुउद्देश्यीय सामुदायिक सिकाइ केन्द्रको आयोजनामा किशोरीहरूका लागि २ दिने…
  • आनन्द ज्योति माविमा शुभकामना आदानप्रदान

    आदर्श समाज सम्वाददाता वैशाख १, २०८१
    पोखरा । भूपू विद्यार्थी मञ्च, आनन्द ज्योति मावि पोखरा ३१ ले नयाँ वर्षको अवसरमा शुभकामना आदानप्रदान कार्यक्रम गरेको छ ।…
  • आलु महोत्सवमा विज्ञ–कृषक अन्तक्र्रिया

    आदर्श समाज सम्वाददाता चैत्र ३०, २०८०
    पोखरा । माटो स्वास्थ्य राखे त्यसबाट बढी उत्पादन लिन सकिने चर्चा गरिएको छ । १२ औं राष्ट्रिय हेमजा आलु महोत्सव…
  • गण्डकी बोर्डिङ व्यवस्थापनमा ३ मनोनीत

    आदर्श समाज सम्वाददाता चैत्र ३०, २०८०
    पोखरा । गण्डकी बोर्डिङस्कुल व्यवस्थापन समितिमा ३ सदस्य मनोनीत भएका छन् । सोमबारको बैठकले जग्गादाता मदनबहादुर केसी, एग्बोसाका निवर्तमान अध्यक्ष…

hero news full width

trending post

ट्रेन्डिङ्ग