पोखरा । पोखरा विश्वविद्यालयले १ सय शैयाको शिक्षण अस्पताल सञ्चालन तयारी गरेको छ ।

अस्पतालको लागि आवश्यक पूर्वाधार निर्माण गर्न विश्वविद्यालयले हाल सञ्चालनमा रहेको छात्रावास भवनलाई परिमार्जन गर्ने सम्बन्धमा ठेक्का सम्झौता भयो ।

विश्वविद्यालयका उपकुलपति प्राडा प्रेमनारायण अर्यालको उपस्थितिमा विश्वविद्यालयका रजिष्ट्रार डा. दीपकबहादुर भण्डारी र सूर्य कन्स्ट्रक्सन कम्पनी प्रालिका प्रबन्ध निर्देशक सूर्यनारायण बरालबीच सो सम्झौता भएको हो ।

स्वास्थ्य संस्थाको भवन तथा पूर्वाधारसम्बन्धी मापदण्ड अनुरूप छात्रावास भवनलाई अस्पतालको रूपमा परिमार्जन गरिनेछ । अस्पतालको विस्तृत प्रारम्भिक वातावरणीय परीक्षण (आइई) अध्ययनपछि ठेक्का सम्झौता भएको हो । ठेक्का सम्झौता करिब ७ करोड ५० लाख रहेको छ ।

अस्पताल भवनमा प्रशासनिक कार्यालय, बहिरंग विभाग (ओपिडि), अन्तरंग विभाग, आकस्मिक तथा शल्य चिकित्सा विभाग, सघन उपचार कक्ष, प्रयोगशाला, फार्मेसी, रेडियोलोजी विभाग लगायत आवश्यक प्रतिक्षा कक्ष, सवारी साधन, पार्किङ, पानी विद्युत, इन्टरनेटको व्यवस्थापन, फोहोर व्यवस्थापन आदिको व्यवस्था हुनेछ । अस्पताललाई चाहिने प्रशासनिक जनशक्ति, क्लिनिकल प्राविधिक जनशक्ति आदिका लागि विज्ञापन भई नियुक्ति गर्ने कार्य समेत अन्तिम चरणमा पुगेको छ । साथै अस्पतालको लागि चाहिने आवश्यक उपकरण तथा सामाग्रीहरूको खरिद योजना तयार भैसकेको छ । सम्झौताबमोजिम ठेकेदारले ६ महिनाभित्र अस्पताल निर्माणको कार्य सम्पन्न गर्नेछ । ओपिडी सञ्चालन भने आउँदो असारको पहिलो हप्ताबाटै सञ्चालन गर्ने विश्वविद्यालयको तयारी रहेको सूचना अधिकृत लोकप्रसाद ढकाले जनाए ।