पोखरा । अन्नपूर्ण केबलकारले विद्यार्थी र नवविवाहित जोडीलाई टिकटमा विशेष छुट दिने भएको छ ।

पर्यटकीय स्थल सेदीबाट फेवातालको दृश्य हेर्दै सराङकोटसम्मको यात्रा गराउने केबलकारको टिकटमा विशेष छुट दिने कम्पनीले जनाएको हो ।

जसमा प्लस टुको परीक्षामा सहभागी भएका विद्यार्थी र नवविवाहित जोडीका लागि टिकटमा विशेष छुटको व्यवस्था गरिएको हो ।

उच्च शिक्षा अध्ययन गर्न प्रोत्साहन गर्ने र मेहेनति हातहरुलाई ऊर्जा प्रदान गर्दै उनीहरुलाई केही समय भए पनि रमाइलो बनाउने उद्देश्य साथ ५० प्रतिशत छुट व्यवस्था गरिएको जनाइएको छ ।

छुट पाउन विद्यार्थीले यस वर्ष परीक्षामा सामेल भएको परीक्षा प्रवेशपत्र अनिवार्य देखाउनु पर्नेछ । सो योजना असार ३ सम्म लागु हुनेछ ।

साथै, नवविवाहित जोडीका लागि केबलकारले विशेष अफर घोषणा गरेको छ । केबलकारले १ टिकटको खरीदमा अर्को टिकट निशुल्क प्रदान गर्नेछ । यो योजनामा सहभागी हुन नवविवाहित जोडीले आफ्नो विवाह कार्ड अनिवार्य देखाउनु पर्नेछ । सो योजना भने असार मसान्तसम्म लागु हुनेछ ।

पोखरामा नयाँ पर्यटकीय गन्तव्यरूपमा थपिएको केवलकार गत वर्ष चैत १ देखि पूर्ण रूपमा सञ्चालनमा आएको हो । सराङकोट ८ देखि ९ मिनेटमा पुग्न सकिन्छ । केवलकारमा ८ जनाको सिट क्षमता रहेका १७ गण्डोला र सामान ओसारपसार गर्ने एउटा गण्डोला जडान गरिएको छ ।

केवलकारको बटम स्टेसन समुद्री तहदेखि ८ सय २४ मिटरको उचाइमा र टप स्टेसन १ हजार ५ सय २३ मिटर उचाइमा रहेको छ । केवलकारको माथिल्लो स्टेसनमा भ्यु टावर, गार्डेन, पार्किङ संरचना, रेस्टुरेन्ट, कफी सप, जिपलाइन, स्काइ साइक्लिङ र स्वीङ संचालनमा रहेका छन् ।