हेमजा । नेलम्बो नेपालले अन्नपूर्ण गाउँपालिका ६, लुम्लेस्थित सिद्ध आधारभूत विद्यालयलाई आइतबार युरोगार्ड हस्तान्तरण गरेको छ ।

संस्थाका अध्यक्ष एकदेव देवकोटाले विद्यालय व्यवस्थापन समितिका अध्यक्ष नुमलाल देवकोटा, वडाध्यक्ष एकदेव देवकोटा, प्रधानाध्यापक नवीन भण्डारी, गाउँपालिकाका शिक्षा शाखा प्रमुख बलराम भुगाईंलगायत उपस्थितिमा युरोगार्ड हस्तान्तरण गरेका हुन् ।

कार्यक्रममा नेलम्बोका अध्यक्ष देवकोटाले शिक्षा, स्वास्थ्य र वातावरणको क्षेत्रमा संस्था क्रियाशील रहँदै आएको जानकारी दिँदै विद्यार्थी तथा शिक्षकको स्वास्थ्यलाई मध्यनजर गरी सामग्री हस्तान्तरण गरिएको स्पष्ट पारे । उनले विद्यालयले सामग्रीलाई संरक्षण गरी प्रयोग गर्नेमा आफूहरु ढुक्क रहेको पनि सुनाए ।

वडाध्यक्ष एकदेव देवकोटाले नेलम्बोले शुद्ध खानेपानीका लागि सहयोग गरेकोमा धन्यवाद दिँदै संस्थाले उदारणीय कार्य गरेको भन्दै प्रशंसा गरे । उनले आगामी दिनमा नेलम्बोसँग सहकार्य गरी अन्य क्रियाकलाप सञ्चालन गर्न वडा तयार रहेको बताए ।

यसैबीच नेलम्बोले मुख तथा दाँतको उपचारका बारेमा सचेतनामूलक कार्यक्रम पनि सञ्चालन गर्‍यो । सो कार्यक्रममा नेलम्बो नेपालका डेन्टल हाइजेनिस्ट सुस्मी बुढामगर, जनसम्पर्क अधिकृत भीमप्रसाद भण्डारी, कर्मचारीहरु रवि गुरुङ, कृष्णप्रसाद देवकोटालगायतले सहजीकरण गरे ।

विद्यालय व्यवस्थापन समितिका अध्यक्ष नुमलाल देवकोटाको अध्यक्षतामा भएको कार्यक्रममा शिक्षा अधिकृत बलराम भुगाईंले धन्यवाद ज्ञापन तथा शिक्षक टंकप्रसाद देवकोटाले सञ्चालन गरे ।