पोखरा । पोखराबाट जोमसोमका लागि उडेको तारा एयरको जहाज आइतबार बिहानदेखि सम्पर्कविहीन भएको छ ।
बिहान ९ बजेर ५५ मिनेट जाँदा पोखराबाट उडेको कलसाइन ९ एनएइटी ट्वीनअटर जहाज अन्तिम पटक १० बजेर ११ मिनेटमा सम्पर्कमा आएको थियो । त्यसपछि सम्पर्कविहीन भएको नेपाल नागरिक उड्ययन प्राधिकरणले जनाएको छ । सम्पर्कविहीन जहाज मुस्ताङको थासाङ गाउँपालिका २, कोवाङको मानापाथी हिमाल आसपास दुर्घटनाग्रस्त भेटिएको दाबी गरिए पनि आइतबार रातिसम्म पत्ता लागेको छैन । जोमसोम विमानस्थलका अनुसार मौसम खराब भएका कारण जहाज झरेको ठाउँ पत्ता नलागेको हो ।
‘हेलिकोप्टरबाट जान सक्ने अवस्था भएन । कुन ठाउँमा दुर्घटना भयो भन्ने पनि पक्का छैन,’ विमानस्थल प्रमुख पुस्कल शर्माले भने, ‘अब पैदल जाने तयारी छ । आर्मी र प्रहरी सहितको टोली तयारी अवस्थामा छ ।’ स्थानीयको भनाइका आधारमा आशंका गरिएको ठाउँ मानापाथी हिमालकै रेन्जलाई मानिएको छ । अहिले सुरक्षा टोलीले त्यसैलाई केन्द्रिकृत गरेर खोजीको तयारी थालेको छ । तारा एयरकै एक जना कर्मचारी र केही प्रहरी भने घटनाको आशंका स्थलमा यसअघि नै गइसकेका छन् तर उनीहरुले सम्पर्क नगरेका कारण घटनाबारे थाहा नभएको यति एयरलाइन्सले जनाएको छ ।
घटनास्थलमा नेपाली सेना, सशस्त्र प्रहरी र नेपाल प्रहरीको टोली खटिएको छ । खोजी र उद्धारमा खटिएको टोली कोवाङ पुगेर बसेको र सोमबार बिहानैदेखि काम सुरु गर्ने मुस्ताङका प्रमुख जिल्ला अधिकारी नेत्रप्रसाद शर्माले जानकारी दिए । ‘टुकुचेसम्म नपुगेको र लेतेबाट पास भएको भन्ने छ । एयरपोर्टसँग कन्ट्याक्ट नभएपछि खोजी गर्न थालेका हौं,’ उनले भने, ‘म्याग्दी कटेर धवलागिरीतर्फ मोडिएको होहल्ला छ । जेहोस्, स्थानीयका कुरा सुन्दा जहाज झरेको ठाउँ करिब नजिक पुगेका छौं ।’
मौसमका कारण उडान ढिला
विमानस्थलका अनुसार पोखरा–जोमसोम उडान बढीमा १७ देखि २० मिनेट हुन्छ । आइतबार बिहान ताराको जहाज उड्नुअघि समिट एयरले २ फ्लाइट गरेको थियो । ६ बजे उड्ने पहिलो फ्लाइटको जहाज मौसमकै खराबीले करिब १० बजेसम्म स्थगित भएको थियो । ‘नउडाउने योजना थियो । समिटले २ फ्लाइट गरेपछि पठाएका हौं,’ यतिका एक कर्मचारीले भने, ‘त्यही भएर ६ बजे उडाउन ठिक्क पारेको जहाज ९ बजेर ५५ मिनेटमा उडेको थियो ।’
को–को थिए जहाजमा ?
बेपत्ता जहाजमा चालक दलका ३ सदस्यसहित २२ जना रहेको विमानस्थलले जनाएको छ । चालक दलमा पाइलट प्रभाकर घिमिरे, सहायक पाइलट उत्सव पोखरेल र एयर होस्टेस किस्मी थापा रहेको पोखरा विमानस्थलका प्रमुख विक्रम गौतमले जानकारी दिए । यात्रुमा बान्देकर वैसवी, इन्द्रबहादुर गोले, पुरुषोत्तम गोले, राजनकुमार गोले, मेइक ग्रिटग्राफ, वसन्त लामा, गणेशनारायण श्रेष्ठ, रविना श्रेष्ठ, रश्मी श्रेष्ठ, रोजिना श्रेष्ठ गएका थिए । यसैगरी, प्रकाश सुनुवार, मकरबहादुर तामाङ, राममाया तामाङ, सुकुमाया तामाङ, तुलसादेवी तामाङ, अशोककुमार त्रिपाठी, धनुश त्रिपाठी, ऋतिका त्रिपाठी, बि विलनर पनि जहाजमा रहेको खुलेको छ । यात्रुमा २ जना जर्मन नागरिक, ४ भारतीय र १३ जना नेपाली हुन् ।
के भन्छन् स्थानीय ?
मुस्ताङको मौसम निकै खराब थियो । शनिबारदेखि पानी परेकाले त्यहाँ बाक्लो हुस्सु र कुहिरो थियो । यत्तिकैमा आकाशमा जहाजको आवाज आयो । स्थानीयले जहाज देखेका थिएनन्, आवाज मात्रै सुनेका थिए । सवा १० बजेतिर लार्जुङमा एसेम्ब्ली चलिरहेको थियो । जहाजको आवाज सुनेपछि अनेक अड्कलबाजी गरिएको थियो । ‘हामी एसेम्ब्ली गर्दै थियौं । स्कुलमाथि तिर जहाजको आवाज आइरहेको थियो । केही साथीहरुले डोल्पा हिड्न लागेको भनेर ठट्टा गर्नुभयो । एकजनाले यो अब हराउने भो भनेर पनि चर्चा गर्नुभयो,’ शिक्षक वीरेन्द्र लामिछानेले भने, ‘केहीबेरमा आवाज हरायो । जहाज सम्पर्कविहीन भएको समाचार सुन्यौं ।’
विमानमा चालक दलका ३ सदस्य र १९ यात्रु गरी २२ जना थिए
अर्का स्थानीयले लेते क्षेत्रमा उक्त जहाज २ पटकसम्म घुमेको बताएका छन् । ‘यहाँका स्थानीयले आवाज सुनेका रहेछन् । प्रहरीले पनि त्यो आवाज सुनेको भन्ने छ,’ स्थायीयसमेत रहेका पत्रकार सुशील थकालीले भने, ‘बादल टम्मै छ । कतै केही देखिंदैन । एक पटक आवाज अलि अस्वभाविक पनि सुनेका रहेछन् ।’ स्थानीयकै कुरा सुनेर अहिले प्रहरी मानापाथी हिमाल क्षेत्रमा केन्द्रित भएको छ । जहाज खोज्न पोखराबाट आर्मीको हेलिकोप्टर गएको छ भने जोमसोममा फिस्टेल एयरको अर्को हेलिकोप्टर राखिएको छ ।
यार्सा टिप्न गएकाहरुले पनि मानापाथी हिमालकै आसपासलाई संकेत गरेका छन् । जहाज दुर्घटनामा परेकाहरुको आफन्त दिनभर पोखरा विमानस्थलमा भावविह्वल थिए । जहाज सम्पर्कविहीन भएको समाचार पछि उनीहरु एयरपोर्टमा भेला भएका हुन् ।
मानापाथी हिमाल आसपासमा भेटिएको भनिएको जहान खोज्न शेर्पा टोली त्यसतर्फ पठाइएको छ । पोखरा विमानस्थलबाट कैलास एयर र डाइनेस्टिकको हेलिकोप्टरले मानापाथी हिमाल फेदी भन्दा केही पर उनीहरुलाई छोडेर फर्केको छ । टोलीमा ९ शेर्पा र आर्मी छन् । दुर्घटना लोकेट भएको भनिएको स्थान र उनीहरुलाई छोडिएको स्थान पैदल यात्रामा ३÷४ घण्टा टाढा पर्छ ।
७ वर्षअघिको त्यो दुर्घटना
आजभन्दा ७ वर्षअघि पोखराबाट जोमसोमकै लागि उडेको तारा एयरको जहाज सोही रुटमा दुर्घटनामा परेको थियो । २०७२ फागुन १२ मा ९एन–एएचएच कलसाइन ट्वीनेटर विमान म्याग्दीको दानास्थित केकरको बुटामा दुर्घटना भएको हो । दुर्घटनामा चालक दलका ३ जना र २ बालबालिकासहित २३ जनाको मृत्यु भएको थियो । पोखरा जोमसोम हवाइ रुट निकै जोखिमपूर्ण छ । यो रुटमा करिब ५ मिनेट कुनै पनि टावरले काम गर्दैन । त्यसैले प्राधिकरणले नै यो ठाउँलाई ‘बफरिङ जोन’ भनेर चिनाउँछ । घोरेपानीदेखि तातोपानीसम्मको भागमा पाइलटले चाहेर पनि टावरसँग कनेक्सन गर्न सक्दैन । तर अहिलेको दुर्घटना भने टावरसँग सम्पर्क भइसकेपछि भएको बताइएको छ । पोखरा टावरबाट छुटेर जोमसोम टावरसँग सम्पर्क भएपछि पाइलटले मौसमबारे सोधेका थिए ।
Related News
सम्बन्धित समाचार
रेवान पोखरामा विश्वराज
कर्जा विस्तार हुनेगरी मौद्रिक नीति ल्यायौंः गभर्नर अधिकारी
गायक तथा गीतकार एलपी जोशी रहेनन्
आज मौद्रिक नीति सार्वजनिक हुँदै
पोखराको गन्नीलाई रनिङ सिल्ड
hero news full width
मुख्य समाचार
लीलादेवी बनिन् पहिलो महिला मुख्यसचिव
राइड सेयरिङविरुद्ध पोखराका यातायात व्यवसायीको आन्दोलन
श्रावण १०, २०८१जहाज सि चेकका लागि पोखरा आउँदै थियो
श्रावण ९, २०८१कन्टेनरमा बजारिएर दुई टुक्रा भयो, अनि आगो लाग्यो
श्रावण ९, २०८१सौर्य एयर दुर्घटनामा १८ जनाको मृृत्यु
श्रावण ९, २०८१त्रिभुवन विमानस्थलमा सौर्यको जहाज दुर्घटना
श्रावण ९, २०८१