पोखरा । गण्डकी प्रदेशका ८५ मध्ये २ पालिकामा मात्रै दलित समुदायबाट नेतृत्वमा निर्वाचित भएका छन् । पालिका प्रमुखमा २ जनामात्रै निर्वाचित भएका हुन् । बागलुङको ढोरपाटनका मेयर देवकुमार नेपाली एमालेबाट विजयी भएका हुन् भने ताराखोला गाउँपालिकाको अध्यक्षमा धनबहादुर विक माओवादी केन्द्रबाट निर्वाचित भएका हुन् । एमालेले गोरखाको आरुघाट गाउँपालिका अध्यक्षमा कृष्णबहादुर नेपालीलाई टिकट दिएको थियो । नेकपा माओवादीले मंगला गाउँपालिका अध्यक्षमा टेकबहादुर विक र रघुगंगा गाउँपालिका अध्यक्षमा मीना विकलाई उम्मेदवार बनाएको थियो ।

उपप्रमुखतर्फ गोरखाको आरुघाट गाउँपालिका उपाध्यक्षमा कल्पना नेपाली निर्वाचित भएकी छिन् भने भानु नगरपालिकाको उपप्रमुखमा उमा गोतामे निर्वाचित भइन् । उनीहरु दुवैजना कांग्रेसबाट टिकट पाएका थिए । यता शुक्लागण्डकी नगरपालिकाको उपप्रमुखमा खुमबहादुर विक माओवादीबाट निर्वाचित भए । महाशिला गाउँपालिका उपाध्यक्षमा एमालेबाट धनसुवा विक र सोही पालिकाको ६ नम्बर वडाध्यक्षमा गोविन्द विकले चुनाव जितेका छन् ।

नेकपा एमालेले गलकोटको उपमेयरमा रुपा विक र नेकपा माओवादीले मालिकाको उपमेयरमा गौरी सेन्चुरीलाई उम्मेदवार उठाएको थियो । उनीहरु निर्वाचित हुन सकेनन् । यसबाहेक ठूला पार्टीहरुले प्रमुख र उपप्रमुखमा दलितबाट उम्मेदवारी दिएका थिएनन् । स्वतन्त्र र दलसहित १९ जनाले प्रमुख र १९ जनाले नै उपप्रमुखमा उम्मेदवारी दिएका थिए । स्वतन्त्रबाट प्रमुखमा ७ र दलबाट १२ जनाको उम्मेदवारी परेको थियो । उपप्रमुखमा भने स्वतन्त्रबाट २ जना र दलबाट १७ जनाको उम्मेदवारी दियो ।

गण्डकी गाउँपालिका ५ मा माओवादीबाट पहलमान बयलकोटी, गोरखा नगरपालिका १३ मा कांग्रेसबाट मित्रकुमारी परियार निर्वाचित भइन् । पालुङटार नगरपालिकाको १ नम्बर वडामा जसपाबाट कृष्ण परियार र ८ नम्बरमा जसपाबाटै होपबहादुर नेपाली निर्वाचित भएका छन् । राइनास नगरपालिका ५ को वडाध्यक्षमा शंकबहादुर सार्की माओवादीबाट चयन भएका छन् ।

जैमिनी नगरपालिकाको ७ नम्बर वडामा कांग्रेसका केन्द्रबहादुर सुनार, बागलुङ नगरपालिका २ मा सुरज बोसेल, काठेखोला गाउँपालिका ३ मा कुलबहादुर विक एमालेबाट निर्वाचित हुँदा तमानखोला गाउँपालिकाको २ नम्बर वडामा नारायण सुनार माअ‍ोवादीबाट र ५ नम्बरमा हिराबहादुर विक कांग्रेसबाट निर्वाचित भए । ढोरपाटन नगरपालिका २ मा खीमबहादुर सुनार र ८ मा भद्रमणि सुनार तथा निसीखोला २ मा कुविर विक अध्यक्षमा चयन भए । धवलागिरी गाउँपालिका वडा नम्बर २ मा अकप्रसाद विक पनि अध्यक्षमा निर्वाचित भएका छन् ।