पोखरा । चलचित्र पत्रकार संघको २३ औं वार्षिकोत्सव तथा राष्ट्रिय चलचित्र पत्रकारिता दिवस–२०७९ अवसरमा चलचित्र पत्रकार संघ कास्कीले शनिबार शुभकामना आदानप्रदान एव क्यालेन्डर विमोचन गरेको छ ।

समारोहमा चलचित्र पत्रकार संघ कास्कीका संस्थापक अध्यक्ष श्रीराम सिग्देल, संघ अध्यक्ष अरुण गिरी, निवर्तमान अध्यक्ष रेम बिक, पोखरा फिल्म सोसाइटी अध्यक्ष जिवेश प्रधान, उपाध्यक्ष सन्तोष सुवेदी, सचिव प्रभु अधिकारी, सहसचिव सन्तोष बस्याल लगायतले शुभकामना मन्तव्य व्यक्त गरे । कार्यक्रममा संघका सदस्य, विभिन्न संघसंस्थामा आबद्ध व्यक्तिको उपस्थिति थियो ।

कला क्षेत्रमा कलम चलाउने पत्रकारले २०५६ जेठ ७ मा काठमाडौंमा भरत शाक्यको अध्यक्षतामा पहिलो पटक चलचित्र पत्रकार संघ गठन गरेका थिए । सोही दिनको सम्झनामा संघले दिवस मनाउँदै आएको छ ।

काठमाडौंबाहिर भने पहिलो पटक पोखरामा २०६० असार २२ मा श्रीराम सिग्देलको अध्यक्षतामा शाखा बिस्तार गरिएको हो । हालसम्म पोखराको नेतृत्व सिग्देलपछि शिव शर्मा चञ्चल, रेम बिक र अरुण गिरीले गरिसकेका छन् । संघ केन्द्रले पोखरापछि नारायणगढ, बुटवल, दाङ, हेटौंडा र धरानमा शाखा बिस्तार गरेको हो ।