पोखरा, ७ जेठ । सुन्दरी प्रतियोगितामा भाग लिएकी एक युवतीलाई आयोजकले नै बलात्कार गरेको घटनाको तरंग तालनगरीसम्म आइपुगेको छ ।
८ वर्षअघि सम्पन्न प्रतियोगितामा फस्ट रनर अप सुस्मिता रेग्मीमाथि आयोजकले गरेको बलात्कारविरुद्धमा पोखरामा वुमन्स रुम रिलोडेड (डब्लुआरआर) ले शनिबार विरोध प्रदर्शन गरेको हो ।

सयौंको संख्यामा सहभागी युवतीहरुले विभिन्न नाराबाजी गर्दै चिप्लेढुंगास्थित मानवअधिकारचोकदेखि सभागृहचोकसम्म विरोध प्रदर्शन गरेका हुन् । उनीहरुले ‘अब त अति भो, नबोल्दा क्षति भो’, छोड कुरा बाँकी सव, संविधानमा फाँसी थप, ठूला समृद्ध भनेका देशमा हदम्याद छैन, हाम्रो देशमा किन ?, जस्टिस फर सुस्मिता लगायतका नाराअंकित प्लेकार्ड बोकेका थिए । खासगरी युवतीहरुले बलात्कारीलाई कडा कारबाही हुनपर्ने भन्दै पीडितले अदालतमा उजुरी दिने समयावधि (हदम्याद) थप हुनुपर्ने माग गरेका छन् ।

तस्बिरहरुः अरुण गिरी ।