पोखरा, ६ जेठ । पोखरा महानगरपालिकाको मेयर र उपमेयरमा सत्ता गठबन्धनले अग्रता कायमै राखेको छ । मेयरमा ३ हजार ४ सय ४२ मतान्तरले नेकपा (एकीकृत समाजवादी) ले अग्रता कायमै गर्दा उपमेयरमा नेपाली कांग्रेस ८४ मतान्तरसहित अघि छ ।

मेयरमा एकीकृत समाजवादीका धनराज आचार्यले शुक्रबार राति ७ बजेसम्म ७२ हजार ९ सय १८ मतगणनामा २९ हजार ८ सय ७ मत प्राप्त गरेका छन् । उनका निकटतम् प्रतिस्पर्धी नेकपा एमालेका उम्मेदवार कृष्ण थापाले २६ हजार ३ सय ६५ मत प्राप्त गरेका छन् । राप्रपाका शंकर खरालले ३ हजार १ सय ४५ र स्वतन्त्रका उम्मेदवार गनेस पौडेलले १ हजार ९ सय ६६ मत प्राप्त गरेका छन् ।

उपमेयरमा कडा प्रतिस्पर्धा छ । सत्ता गठबन्धनबाट नेपाली कांग्रेसकी उम्मेदवार कोपिला रानाभाट ७२ हजार मतगणना हुँदा मात्र ८४ अन्तरले अघि छिन् । उनले ३० हजार २ सय ६० मत प्राप्त गर्दा एमालेकी मञ्जुदेवी गुरुङले ३० हजार १ सय ७६ मत ल्याएकी छन् ।

स्थानीय तह निर्वाचनअन्तर्गत शुक्रबारको मतदानमा पोखरा महानगरपालिकामा २ लाख ७ हजार मतदातामध्ये १ लाख ४३ हजार मत खसेको थियो ।