विजय नेपाल

पोखरा, ३१ वैशाख । पोखरा महानगरपालिकाको मतगणना अझै सुरु हुन सकेको छैन । बिहान साढे ८ बजेदेखि सुरु भएको सर्वदलीय बैठक लम्बिएपछि मध्यान्ह १२ बजेसम्म पनि गणना सुरु हुन नसकेको हो । दिउँसो २ बजेदेखिमात्र गणना सुरु गर्ने सर्वदलीय बैठकको निर्णय छ ।

स्थानीय तह निर्वाचनअन्तर्गत शुक्रबार कुल ३३ वटा वडा रहेको पोखरामा ६८.९५ प्रतिशत मत खसेको थियो । पोखरामा २ लाख ७ हजार ७ सय १२ मतदातामध्ये १ लाख ४३ हजार २ सय २६ जनाले मतदान गरेको पोखरास्थित निर्वाचन कार्यालयका प्रमुख हुमनाथ पराजुलीले जानकारी दिए ।

पोखराको मतगणना सहिदचोकस्थित मुख्य निर्वाचन अधिकृत कार्यालय रहेको पोखरा उपत्यका नगर विकास समितिको सभाहलमा र जिल्ला समन्वय समितिको सभाहलमा गरिने तयारी छ । मतगणनाको सुरक्षाका लागि गणनास्थलमा तारबार गरिएको छ । दुवै स्थानमा गरी कुल ६ ठाउँमा मतगणना गरिने छ । पोखराको मेयरमा २३ र उपमेयरमा ८ जनाबीच प्रतिस्पर्धा छ ।

कास्कीमा पोखरा सहित ५ पालिका छन् । त्यसमध्ये रुपा र माछापुच्छे« गाउँपालिकाको मतगणना सुरु भएको छ ।

कास्कीमा कुल २ लाख ८१ हजार ८ सय ३३ मतदातामध्ये शुक्रबारको मतदानमा ६९.९० प्रतिशत मत खसेको थियो । २०७४ सालको स्थानीय तह चुनावमा कास्कीमा ७५ प्रतिशत मत खसेको थियो । कास्कीमा पोखरा, रुपा, माछापुच्छे«, अन्नपूर्ण, मादी र रुपामा गरी कुल ७२ वडा छन् ।