बोधबहादुर कार्की नेपाली कांग्रेसको तर्फबाट पोखरा महानगरपालिका वडा नम्बर १४ का लागि आसन्न स्थानीय तहको निर्वाचनमा अध्यक्ष पदका उम्मेदवार हुन् । लामो समयदेखि राजनीतिमा सक्रिय उनी सामाजिक तथा धार्मिक काममा पनि उत्तिकै लागि पर्ने व्यक्तित्व हुन् । पोखराको ल्यान्डफिलसाइट र नयाँ विमानस्थल निर्माणपूर्वदेखि नै पोखराको दक्षिणी भेगमा पूर्वाधार र विकास भित्र्याउन उनले खेलेको महत्वपूर्ण भूमिका सम्झन लायक मानिन्छ । २०४६ सालबाटै राजनीतिमा सक्रिय युवा उम्मेदवार कार्कीसँग नजिकिँदै गरेको निर्वाचनको सन्दर्भलाई लिएर आदर्श समाज प्रतिनिधिले गरेको वार्तालापको सारसंक्षेप यहाँ प्रस्तुत गरिएको छ :

तपाईंको चुनावी प्रचार अभियान कसरी अगाडि बढ्दै छ, पाँच दलीय गठबन्धनभित्रको खटपट मिलिसकेको हो ?

प्रचारप्रसारको कामलाई हामीले व्यवस्थित ढंगले अगाडि बढाएका छौं । समूह नै बनाएर हरेक दिन गाउँ र टोल डुल्ने तथा मतदातालाई भेट्ने काम भएको छ । उहाँहरु सबैले मेरो उम्मेदवारीलाई सकारात्मक रुपमा लिनुभएको छ । यस अभियानमा हामीले निर्वाचनको आचारसंहितालाई मध्यनजर राख्दै नेपाली नेपाली कांग्रेसका स्थानीय नेता तथा कार्यकर्तासहित हरेक जनताको घरदैलोमा पुगी जनताका समस्या पहिचान गर्ने, मत माग्ने र पूर्ण रुपमा वाचाकबोलका साथ समस्या समाधान गर्ने प्रतिबद्धतासहित अगाडि बढिरहेका छौं ।
गठबन्धनको कुरा गर्दा यो राष्ट्रिय पार्टीको बाध्यात्मक परिस्थितिको उपज हुन पुग्यो । हाम्रा अग्रज नेताहरुले निर्णय गरेपछि हामीले त्यसलाई मान्यौं । नेपाली कांग्रेसलाई गठबन्धन गर्नु जरुरी त थिएन तर बाध्यतावश र माथिको कारणले गर्दा यो सबै भएको हो । वडामा एक सदस्य सिट नेकपा माओवादी केन्द्रलाई प्रदान गर्ने शर्तमा यहाँ गठबन्धन भएको छ । नेकपा एकीकृत समाजवादीले त मेयरकै उम्मेदवार पाउनुभएको छ । गठबन्धनभित्र अहिले त्यस्तो केही खटपट छैन, सबै कुरा मिलिसकेको छ ।

तपाईंका भावी योजनाहरु के–कस्ता रहेका छन्?

विशेषतः वडा नम्बर १४ लाई पोखराका अन्य ३२ वटा वडाभन्दा नमुना वडा बनाउनका लागि दत्तचित्त भएर लागिपर्ने मेरो योजना छ । यसका लागि जनतासँग वचनबद्धता पनि प्रकट गर्दै हिँडेका छौं । शिक्षा, स्वास्थ्य, विद्युत्, खानेपानी, सिँचाइलगायत पूर्वाधारका काममा मेरो ध्यान जानेछ । शिक्षालाई गुणस्तरीय बनाउने र प्रत्येक सरकारी विद्यालयमा प्राविधिक शिक्षा प्रदान गर्ने योजना पनि मैले समेटेको छु । सुकुमवासी र अव्यवस्थित जग्गाधनीको समस्या समाधानका लागि मैले पहल गर्ने छु । यसैगरी यस १४ नम्बर क्षेत्रमा एम्बुलेन्स सेवा सञ्चालन गर्ने मेरो योजना छ । पोखराको यो तल्लो बेल्ट भएका कारण र सवारी साधानका पहुँच पनि चाहेजस्तो सहज नभएका कारण एम्बुलेन्स सेवाले जनतालाई दुख परेको बेला राहत हुनेछ । युवाहरुको हकमा कम्तीमा पनि ५० जनालाई एक वर्षमा रोजगारी प्रदान गर्ने गरी मैले काम गर्नेछु । अरु थुप्रै विकास योजनाका कुराहरु हामीले हाम्रो घोषणापत्रमा पनि समटेका छौं । यसैगरी आफूले पाएको तलब भत्ता र सुविधाहरु राज्यबाट लिएर गरिब, निमुखा, असहाय र सरकारी विद्यालयमा पढ्ने विद्यार्थीलाई छात्रवृत्तिको रुपमा प्रदान गर्ने मेरो लक्ष्य छ । यी र यस्तै आधारले पनि मैले चुनाव जित्नेमा ढुक्क छु ।

आफ्नो उम्मेदवारीलाई कसरी हेर्नुभएको छ, तपाईंले चुनाव जित्ने आधार के छन्?

मैले विगत ३० वर्षदेखि यस वडामा विभिन्न सामाजिक र धार्मिक काममार्फत् सेवा गर्दै आएको छु । यस क्षेत्रको आर्थिक आर्थिक र शैक्षिक विकासमा समेत म उत्तिकै अग्रसर र सक्रिय भएर काम गर्दै आएको छु । यस क्षेत्रका विभिन्न क्लबहरु, मन्दिरहरु र आमा समूहका कार्यक्रमहरुमा पनि म पुग्ने र सहयोग गर्ने गरेको छु । यस क्षेत्रलाई विकृति र विसंगतिरहित बनाउन तथा युवा रोजगारीका लागि समेत मेरो योगदान छ । त्यसकारण मतदातालाई म के आह्वान गर्न चाहन्छु भने म पहिला यस वडामा झिनो मतले हारेको युवा हो । अहिले सबैले तिमी उठ्नुपर्छ भनेर हौसला प्रदान गरेपछि मैले उम्मेदवारी दिएको हुँ । पार्टीले पनि जुझारु युवा भनेर मलाई अगाडि बढाएको हो । मैले यहाँका जनता, मतदाता र मैले संघसंस्था, टोल, मन्दिर र आमा समूहमा गरेको काम, सहयोग र सहकार्य गरेको छु । त्यसैले मेरो योगदान नै मैले चुनाव जित्ने आधार हो । विपक्षी दलका साथीहरुले पनि मलाई प्रोत्साहन दिनुभएको छ, सदासयता प्रकट गर्नुभएको छ ।

विमानस्थल र एयरपोर्टका सन्दर्भमा १४ नम्बर वडाको विकास र त्यस क्षेत्रका जनताको हितका लागि निकै लाग्नुभयो, यो विषयलाई कसरी सम्झन चाहनुहुन्छ?

यस क्षेत्रका जनताको सहयोग नभएको भए अहिले पोखरामा अन्तर्राष्ट्रिय विमानस्थल बन्न सक्ने अवस्था थिएन । सस्तो मुआब्जामा यस क्षेत्रका जग्गाधनीले थुप्रै जग्गा सरकारलाई दिएका छन् । यसैगरी ल्यान्डफिलसाइट निर्माणको क्रममा पनि यस क्षेत्रको सकारात्मक सहयोग नभएको भए काम अगाडि बढ्न सक्ने थिए । ल्यान्डफिलसाइटको निर्माण भइसकेपछि पनि यस क्षेत्रको विकासका लागि पहलकदमी लिएर मैले काम गरेको हुँ । एयरपोर्टको माध्यमबाट पनि विकासका लागि थुप्रै पहलहरु गरियो । धेरै धम्की र चुनौतीको सामना गरेर अगाडि बढेका हौं । तर हामीले राखेका मागहरु जस्ताको तस्तै अझै पूरा भएका छैनन् । हामीले माग राख्यौं तर सरकारीस्तरबाट पूर्ण रुपमा सुनुवाई भएन । पछिल्लोपटक यस क्षेत्रको सिँचाइको लागि मेरो अगुवाईमा पहल अगाडि बढाएपछि ३५ करोड रुपैयाँको प्रतिबद्धता आएको छ । यो आयोजना सफल भएपछि यहाँको दक्षिणी भेकमा राम्रो सिँचाइको व्यवस्था हुनेछ ।

तपाईंको राजनीतिक र सामाजिक जीवन कसरी अगाडि बढ्यो?

म २०४६ सालबाट नेपाल विद्यार्थी संघको सदस्य भएर राजनीतिमा प्रवेश गरेको हुँ । पृथ्वीनारायण क्याम्पसको आन्दोलनमा पनि सहभागी भई मैले संघर्ष गरेको छु । २०४६ र २०६२/०६३ को आन्दोलनमा पनि मेरो सक्रिय सहभागिता रह्यो । पछिल्लो आन्दोलनमा म १५ दिन राजनीतिक बन्दीको रुपमा पनि रहन पुगेँ । पछि आएर पार्टीको तर्फबाट गण्डकी प्रदेशको अधिवेशन प्रतिनिधिको रुपमा चुनिएँ । नेपाली कांग्रेस १४ नम्बर वडाको सभापति भएर ३ कार्यकाल काम गरिसकेको छु । म पूर्व आमन्त्रित कास्की जिल्ला सदस्य र पूर्व क्षेत्रीय सदस्य बनेको छु । यस्तै स्थानीय शुभकामना बचत तथा ऋण सहकारी संस्थाको संस्थापक अध्यक्ष, माछापुच्छ«े सामुदायिक सेवा भवनका संस्थापक अध्यक्ष, काजीपोखरीस्थित कालिका बहुमुखी क्याम्पसको उपाध्यक्ष र सामुदायिक प्रहरी सेवा कास्कीमा अध्यक्षका रुपमा म जोडिन पुगेको छु । यसैगरी स्थानीय वात्स्यायन वृद्धाश्रमको अध्यक्ष, सहरी स्वास्थ्य केन्द्र वडा १४ को उपाध्यक्ष, शुक्रराज बलभद्र माविको पूर्व अध्यक्ष एवं वर्तमान सल्लाहकार, नेपाल रेडक्रस सोसाइटीको विशिष्ट सदस्य भएर पनि काम गरेको छु । लायन्स क्लब अफ पोखरा विन्ध्यवासिनी चौतारीको संस्थापक अध्यक्ष, स्थानीय मनोहर युवा क्लब र नवप्रतिभा सामुदायिक विकास प्रतिष्ठानमा सल्लाहकार पनि रहन पुगेको छु । म रोटरी क्लब अफ पोखरा फिस्टेलको संस्थापक सदस्य पनि हुँ । खुला दिशामुक्त अभियान वडा १४ को कार्यक्रम संयोजक भएर काम गरेबापत् स्थानीय विकासमन्त्रीबाट म पुरस्कृत पनि भएको थिएँ ।