पोखरा । पोखरा महानगरपालिकाको नेकपा एमालेले उम्मेदवार बनाएका दीपक पौडेल विवादमा मुछिएको र उपमेयरका उम्मेदवार मञ्जु गुरुङले पार्टीको निर्णय स्वीकार गर्न नसकिने बताएपछि अहिले एमाले अप्ठेरोमा परेको छ ।

निर्वाचन आयोगले हिजो र आजलाई मनोनयनको दिन तोकेको छ । मनोनयनको दिन अगावै उम्मेदवार छानेर ढुक्क भएको एमालेलाई दीपक पौडेलको केही वर्ष अगाडिको सुन कान्ड घाँडो बनेको छ ।

पोखराकै एक सुन पसलबाट गहना निकालेर खल्तीमा हालेको सिसिटिभी फुटेज केही वर्ष अगाडि सार्वजनिक भएको थियो । अहिले चुनावका बेला त्यही भिडियो भाइरल भएपछि एमालेमाथि उम्मेदवार फेर्न दबाब थपिएको छ ।

एमालेका उपमहासचिव एवं सञ्चार विभाग प्रमुख पृथ्वीसुब्बा गुरुङ र संगठन विभाग प्रमुख खगराज अधिकारीबीचको टकरावका कारण मध्यमार्ग एवं ओली निकट मानिने पौडेलले उम्मेदवारको टिकट पाउन सफल भएका थिए । तर जसै उनी विवादमा तानिएका छन्, उसै एमाले अप्ठेरोमा परेको हो ।

त्यसो त दीपक पौडेलको राजनीतिक यात्रा लामै छ । पोखरा १९ पुरनचौरका पौडेल माध्यमिक तहको शिक्षबाट अवकाशप्राप्त हुन् । उनी एमाले निकट शिक्षक संगठनको राष्ट्रिय उपाध्यक्ष हुन् । पोखरा महानगर पार्टी कमिटीको अध्यक्ष पनि उनी भइसकेका छन् ।

विकासको भिजन भएका र राजनीतिमै होमिएका युवा पुस्तालाई पाखा लगाएर एमालेले पौडेललाई महानगरको टिकट दिने निधो गरेको थियो । एमालेभित्रै र बाहिर उनलाई एमालेभित्रको कमजोर उम्मेदवारका रुपमा चित्रण गरिएको थियो । एमालेबाटै केही सयममात्र बाहिरिएका नेकपा समाजवादीका कास्की अध्यक्ष धनराज आचायको उम्मेदवारीलाई एमालेको यो निर्णयले सहज बनाइदिएको टिप्पणी समेत भएको थियो ।
तर दीपक पौडेल भने आफ्नो चरित्र हत्या भएको र त्यस्तो कान्डमा आफू संलग्न नै नभएको जिकीर गरेका छन् ।

उता उपमेयरका लागि सिफारिस मञ्जु गुरुङको अस्वीकार्यताले पनि एमाले अप्ठेरोमै परेको छ । पार्टीले मेयरका लागि टिकट नदिने संकेत पाएपछि उनले मेयर उपमेयर दुवै पदका लागि दाबी नै गरिनन् । तर एकाएक उनको नाम उपमेयरमै आयो । बहालवाला उपमेयर र मेयर बिरामी भएका बेला कार्यवाहक भएर काम गरेकी उनले मेयरमा दाबी गर्नु पनि स्वभाविक नै थियो ।

अहिले दीपक पौडेलको ठाउँमा मञ्जुलाई टिकट दिने र मञ्जुको स्थानको दोस्रो व्यक्ति खोज्ने बारेमा चर्चा सुरु भएको छ ।