नवलपुर, ७ वैशाख । अभिनेता पल शाहविरुद्ध परेको जबर्जस्ती करण मुद्दामा पीडित नावालिग गायिकाले नवलपुर जिल्ला अदालतमा पनि बयान फेरेकी छन् ।
पीडित नावालिकाको बुधबार वकपत्र गरिएकोमा उनले तनहुँमा झैं बयान फेरेको वकपत्र लिंदा बसेका एक जना सहभागीले बताए ।

जिल्ला न्यायाधीश नन्दकिशोरप्रसाद यादवको इजलाशमा वकपत्र गरिएको थियो । त्यसअघि उनले वैशाख १ मा जिल्ला अदालत तनहुँमा भएको बकपत्रमा बयान फेरेकी थिइन् ।

तनहुँ जिल्ला अदालतमाझैं आफूमाथि जबर्जस्ती करणी नै नभएको र अभियुक्त पल शाह निर्दोष रहेको उनले बकपत्र गरेकी हुन् ।

अदालतका कर्मचारीका अनुसार सरकारी वकिलहरुले २०/२२ वटा प्रश्न सोधेर जिरह गरेका थिए । त्यति हुँदा पनि पीडितले कलाकार शाह निर्दोष रहेको र उनले आफूमाथि केही नगरेको बयान दिएकी हुन् । बलात्कार भएको भनी आफूले आवेशमा आएर तनहूँमा त्यसघि बयान दिएको उनको भनाइ थियो ।

नवलपुरमा गायिकाको बुवा, कलाकार दुर्गेश थापा, कृष्ण जोशी, सम्राट चौलागाई, मेडिकल रिपोर्ट तयार पारेका डाक्टर लगायतको बकपत्र तयार पारिने छ । बुधबार अरुको वकपत्र नसकिएकोले अन्यको वकपत्र बिहीबारमात्र गरिने छ ।