पोखरा । पाल्पाली बहुउद्देश्यीय सहकारी संस्थाले सहकारीका सञ्चालक, सेयर सदस्य र कर्मचारीको ज्ञान, सीप र क्षमता अभिवृद्धिका लागि अध्ययन अवलोकन भ्रमण गरेको छ ।

टोलीले पाल्पा सदरमुकाम तानसेनको वडा १४ अर्गलीस्थित उद्यमी नेपाल कृषि सहकारी संस्था, उद्यमी नेपाल कृषि तथा पशुपन्छी फर्म र रिब्दिकोटस्थित सिर्जना फार्म हाउस अवलोकन गरेको सहकारीका अध्यक्ष चिरञ्जीवी श्रेष्ठले जानकारी दिए ।

सहकारीका निवर्तमान अध्यक्ष तथा कार्यक्रम संयोजक कुलप्रसाद घिमिरेले सहकारीको मुल मर्म र भावना अनुसार सामूहिक रुपमा व्यवसाय गरे सफलता मिल्ने विषय अध्ययन भ्रमणबाट सिकेको जानकारी दिए । उनले कृषि र पर्यटन जोडेर व्यवसाय गरेमा आर्थिक उपार्जनसँगै जीविकोपार्जनमा टेवा दिने बताए ।

सिर्जना फार्म हाउसका सञ्चालक विष्णु अधिकारी, उद्यमी नेपाल कृषि सहकारी संस्थाका सञ्चालक शोभाखर भट्टराई, उद्यमी नेपाल कृषि तथा पशुपन्छी फर्मका सल्लाहकार तथा तानसेन १४ का अध्यक्ष कमलबहादुर रानाले उद्यमशीलताको विकास र पर्यटन प्रवद्र्धनको लागि गरेका प्रयासबारे बताए ।

टोलीले स्याङ्जा, पाल्पा र गुल्मीको संगमस्थल रिडीमा निर्मित तीनमुखे पुल, ऋषिकेश र भैरवस्थान मन्दिर, तानसेनको श्रीनरको भ्रमण गरेको छ । त्यस्तै टोलीले तानसेन नगरपालिकाका मेयर अशोककुमार शाही, पाल्पा उद्योग वाणिज्य संघ अध्यक्ष राजु महर्जन, पाल्पा व्यापार संघका अध्यक्ष चिरञ्जीवी पोखरेल लगायतका जनप्रतिनिधि, उद्योगी, व्यवसायी, सहकारीका प्रतिनिधिसँग भेट तथा अन्तरक्रिया गरेको सहकारीका सचिव एवं पाल्पाली समाज पोखराका अध्यक्ष रेशम रचकले जनाए ।