पोखरा । आगामी जेठ महिनामा पोखरामा एड्भेन्चर ट्राभल मार्ट हुने भएको छ । मार्टले यस क्षेत्रको पर्यटन प्रवद्र्धनमा टेवा पुग्ने विश्वास व्यवसायीहरुले लिएका छन् । कोभिड– १९ बाट थला परेको पर्यटन क्षेत्रलाई पुनरुत्थान गर्न यस्तो कार्यक्रम सहयोगी हुने उनीहरुको भनाइ छ ।
आउँदो जेठ १३, १४ र १५ गते मार्ट आयोजना गर्ने गरी तयारी अगाडि बढाइएको पोखरा पर्यटन परिषद्का अध्यक्ष गोपिबहादुर भट्टराईले जानकारी दिए । पोखरा र सिंगो नेपाल सुरक्षित भन्ने सन्देश दिँदै कोभिड मत्थर हुँदै जाँदा यहाँ विभिन्न गतिविधिहरु पनि हुन थाले भन्ने छाप पर्ने गरी गरी मार्ट आयोजना हुन लागेको अध्यक्ष भट्टराईले बताए । ‘पोखरा पर्यटकीय मात्र नभई गतिविधिको पनि राजधानी हो भन्ने सन्देश पनि हामी दिन चाहन्छौं,’ उनले भने ।
व्यवसायीहरुले नेपाल एसोसिएशन अफ टुर एन्ड ट्राभल एजेन्ट्स (नाट्टा) गण्डकीका अध्यक्ष सञ्जयकान्त सिग्देललाई संयोजक चयन गरी मार्टको आन्तरिक तयारी अगाडि बढाएका छन् । सरकारी स्तरबाट मार्टको कार्यविधि पास गर्न भने बाँकी नै रहेको बताइएको छ । मार्टका संयोजक सिग्देलले मार्टलाई सफल पार्ने गरी तयारीहरु अगाडि बढाइएको जानकारी दिए ।
पोखरामा बृहत रुपमा मार्ट आयोजना गर्ने विषयमा नेपाल पर्यटन बोर्ड र पर्यटन मन्त्रालयबीच आपसी द्वन्द्व भएकोमा भने पोखराका व्यवसायीले उति निको मानेका छैनन् । फेवा नयाँ वर्ष महोत्सव उद्घाटन गर्न केही दिन अघि पोखरा आएका संस्कृति, पर्यटन तथा नागरिक उड्डयन मन्त्री प्रेमबहादुर आलेले मार्ट आयोजना गर्न मन्त्रालयले सघाउने बताएका थिए । पोखरालाई पर्यटकीय राजधानी घोषणा गर्ने विषय आगामी नीति तथा कार्यक्रममा समेटिने पनि उनले सो अवसरमा आश्वासन दिएका थिए ।
परिषद्का महासचिव एवं ट्रेकिङ एजेन्सिज एसोसिएसन अफ नेपाल (टान) गण्डकीका पूर्व अध्यक्ष रामचन्द्र शर्माले अन्य ठाउँमा हुने र पोखरामा आयोजना हुने मार्ट फरक हुने बताए । पोखरा पर्यटकीय सहरसमेत भएका कारण देशविदेशमा यहाँबाट प्रवाह हुने सकारात्मक सन्देशले सिंगो नेपाल प्रवद्र्धनमा टेवा पुग्ने उनको विश्वास छ । विदेशी व्लगर र ट्राभल राइटरहरु ल्याएर मार्टमा सहभागी गराउन सके प्रवद्र्धन कार्य थप प्रभावकारी हुने सुझाव उनको छ ।
पोखराका व्यवसायीले लामो समयदेखि फेवा किनारस्थित रत्न मन्दिर सर्वसाधरणका लागि खोल्न माग गर्दै आएकोमा सोही स्थलमा यो मार्ट आयोजना गर्ने सोचमा व्यवसायीहरु छन् । मन्त्री आलेले समेत वैशाख महिनाभित्रमा उक्त पार्क खोल्न सघाउने बताएका थिए । मार्टमा मुख्य गरी नेपाल र विदेशका टुर र ट्राभल अपरेटरहरुले आफ्ना सेवासुविधाका बारेमा जानकारी लिनेदिने काम गर्नेछन् । आफ्ना पर्यटकीय प्याकेजहरुबारे जानकारी तथा तिनको किनबेचसमेत कार्यक्रममा हुने परिषद्ले जानकारी दिएको छ ।
गण्डकी प्रदेश र सिंगो नेपालका पर्यटकीय सेवा सुविधाबारेमा समेत जानकारी लिनेदिने क्रम चल्नेछ । मार्टमा भाग लिन भारत, चीन, कम्बोडिया, भियतनाम, सिंगापुरलगायत अन्य देशबाट समेत गरी कूल २ सय व्यवसायी आउने अनुमान आयोजकको छ । यसअघि २०७६ को जेठ १८ गते परिषद् र नेपाल पर्यटन बोर्डले बिटुबी नाम दिएर एउटा ट्राभल मार्ट आयोजना गरेका थिए । यसैगरी गत मंसिर २ गते पनि टुरिजम नेटवर्किङ नाम दिएर परिषद्ले १ ट्राभल मार्ट आयोजना गरेको थियो ।
पर्यटनका हिसाबले पोखरालाई अन्नपूर्ण र धौलागिरि पदयात्रा क्षेत्र
प्रवेशद्वारको रुपमा समेत बुझ्ने गरिएको छ । यहाँ आउने ६० प्रतिशत पर्यटक पदयात्रामा जाने बताइन्छ । पदयात्रा र हिमाल आरोहण आफैंमा साहसिक गतिविधि हुन् । पोखरा र वरपर पछिल्ला वर्षहरुमा जिपफ्लायर, बन्जी जम्पिङ, स्काई वाक, हनि हन्टिङ, अग्ला र लामा पुलहरुको अवलोकनलगायत सेवा सुविधा थपिंदा यहाँ आयोजना हुने एड्भेन्चर मार्टको सान्दर्भिकता थप बढ्ने विश्वास गर्न सकिन्छ । प्याराग्लाइडिङले त पोखरालाई २ दशकभन्दा बढी समयदेखि चिनाएको छ ।
Related News
सम्बन्धित समाचार
राइड सेयरिङविरुद्ध पोखराका यातायात व्यवसायीको आन्दोलन
खेलमा उत्कृष्ट नतिजा दिन मन्त्री थापाको आग्रह
पोखरा ११ मा वृक्षरोपण
पोखरा आदर्शमा विद्यार्थी स्वागत
न्यु ग्यालेक्सीमा नवआगन्तुक विद्यार्थीलाई अभिमुखीकरण
hero news full width
मुख्य समाचार
रेवान पोखरामा विश्वराज
कर्जा विस्तार हुनेगरी मौद्रिक नीति ल्यायौंः गभर्नर अधिकारी
श्रावण ११, २०८१गायक तथा गीतकार एलपी जोशी रहेनन्
श्रावण ११, २०८१आज मौद्रिक नीति सार्वजनिक हुँदै
श्रावण ११, २०८१पोखराको गन्नीलाई रनिङ सिल्ड
श्रावण १०, २०८१लीलादेवी बनिन् पहिलो महिला मुख्यसचिव
श्रावण १०, २०८१