पोखरा । नेपाली कांग्रेस बिपीका केन्द्रीय सदस्य एवं कास्की सभापति चन्द्रबहादुर रानाभाट पार्टी प्रवेश गरेका छन् । उनीसहित सिंगो बिपी कांग्रेस कास्की कांग्रेसमा समाहित भएको हो । पार्टीले आफ्नो माइन्युटसमेत हस्तान्तरण गरेको छ ।

उनीहरुलाई कांग्रेस गण्डकी प्रदेश सभापति शुक्रराज शर्माले पार्टीको सदस्यता प्रदान गर्दै स्वागत गरे । त्यसो त चन्द्रबहादुर २०३३ सालदेखि नै नेपाली कांग्रेसमा रहेर काम गरेका थिए । २०४२ सालको सत्याग्रहमा जेल गएका रानाभाट साविक राखी गाउँपालिकाका इकाइ सभापतिदेखि लिएर कांग्रेसको विभिन्न पदमा रही काम गरेका थिए । कांग्रेससँग असन्तुष्ट भएपछि २०४४ सालमा उनी बिपी कांग्रेसमा प्रवेश गरेका थिए । पुरानै पार्टीमा प्रवेश गरेपनि उनले राजनीतिको यात्रामा आफूले कांग्रेसबाहेक अर्को विकल्प नदेखेको बताए ।

पार्टीका प्रदेश सभापति शुक्रराज शर्माले केही कुनै कारणबाट बाहिरिएका साथीहरु पुनःआफ्नो घर फर्केर आउँदा खुसी लाग्ने बताए । उनले कांग्रेसभित्र प्रजातन्त्र भएकाले देश र जनताको समृद्घिमा कांग्रेसको विकल्प नभएको जिकिर गरे ।