पोखरा । गुरुङ समुदायको सांस्कृतिक पर्व ट्होंटे मंगलबार पोखरामा धुमधामका साथ मनाइएको छ । तमु धिं नेपालको आयोजना गरेको ट्होंटेमा गण्डकीका मुख्यमन्त्री कृष्णचन्द्र नेपाली पोखरेलेको उपस्थितिमा भएको हो ।

गुरुङ भाषा र भेषभूषालाई संरक्षण र प्रवद्र्धनमा सक्रिय संस्थाको अगुवाइमा वर्षको दुई पटक साउन र चैतको अन्तिम मंगलबार ट्होंटे मनाइन्छ । कार्यक्रममा गण्डकीका मुख्यमन्त्री पोखरेलले तमु समुदायको सांस्कृतिक विकासको थलो क्होंलासोंथरलाई विश्व सम्पदा सूचीमा सूचीकृत गर्ने पहल गर्ने बताए । क्होलासोंथरको संरक्षण र संवद्र्धनका लागि विशेष योजना बनाएर आउन उनले आग्रहसमेत गरे ।

मौलिकता संरक्षणका साथै संस्कृतिको विकासका लागि प्रदेश सरकार तमु समुदायको साथमा रहेको भन्दै उनले संस्कृतिलाई अब आम्दानीसँग जोड्नुपर्ने भनाइ राखे । पराम्परागत रुपमा उत्पादन हुँदै आएको कोदोको रक्सीलाई ब्रान्डिङ गर्न प्रदेशको गण्डकी विश्वविद्यालले प्रक्रिया थालिसकेको जानकारी गराए ।

बिहान पोखरा सभागृहमा भेला भई विभिन्न झाँकी, बाजागाजा, सांस्कृतिक प्रस्तुतिसहित मौलिक भेषभूषामा पृथ्वीचोक, नयाँबजार हुँदै र्‍याली तमु धिं नेपालको प्रांगणमा पुगेको थियो । मुख्यमन्त्री पोखरेल, पोखरा महानगरपालिकाका उपप्रमुख मञ्जुदेवी गुरुङ, तमु धिं नेपालका अध्यक्ष हुमबहादुर गुरुङले प्रकृति र पितृका नाउँमा धूप हालेर र्‍याली सुरु भएको थियो ।

तमु धिं नेपालकी संस्थापक अध्यक्ष कर्म तमुले तमु धिं नेपालले आफ्नो संस्कृति संरक्षण र विकास गर्दै सामूहिकता विकास गरेको बताइन् । ट्होंटे पर्व मात्रै नभएर ऐतिहासिक महत्व रहेको उनको भनाइ थियो । गण्डकी प्रदेश सभा सदस्य मीना गुरुङले तमु समुदाय र गोर्खाहरुको सहरमा तमुहरुले हरेक क्षेत्रमा अगुवाइ गर्न जोड दिनुपर्ने बताइन् ।

तमु धिं नेपालका सांस्कृतिक संयोजक कृष्णुकुमार गुरुङले अब तमुहरुलाई सामुदायिक प्रणालीमार्फत् अघि बढ्ने प्रावधान राखिनुपर्ने भनाइ राखे ।

ट्होंटेमा आयोजित ¥यालीमा बगर तमु समाज प्रथम, चिउली पार्चे तमु समाज दोस्रो, तनहुँ तमु समाज तृतीय हुँदै ३० हजार, २० हजार र १० हजार रुपैयाँसहित ट्रफीबाट पुरस्कृत भए ।

¥यालीमा फूलबारी तमु समाज, दीप तमु समाज, याङ्जाकोट तमु समाज, सिद्धार्थ तमु समाज, र डडुवा दुर्छा तमु समाजलाई विशेष सान्त्वना पुरस्कारबाट पुरस्कृत गरिएको थियो ।

कार्यक्रममा डडुवा दुर्छा तमु समाजबाट घाँटु, तनहुँ तमु समाजबाट चुड्का, चिउली पाचे तमु समाजले छ्याडु, जिफान र तमु कलाकार संघका कलाकाले विविध सांस्कृतिक प्रस्तुति गरेका थिए ।

कार्यक्रममा तमु धिं नेपालको क्षेत्रीय समाजको रुपमा लमजुङ समाज पोखरा र घाचोक लाम्छाने समाजलाई आबद्धतासहित स्वागत सम्मान गरिएको थियो । उक्त अवसरमा जिफानका नवनिर्वाचित समितिलाई बधाई ज्ञापन गरिएको छ । तमु धिं नेपालको निर्माणाधीन भवनका लागि तमु धिं दक्षिण कोरियाबाट १ लाख ४१ हजार १ सय ३१ रुपैयाँ पूर्व अध्यक्ष सुरजमान गुरुङले हस्तान्तरण गरे ।

तमु धिं नेपालका अध्यक्ष हुमबहादुर गुरुङको अध्यक्षतामा भएको कार्यक्रममा मूल्यांकन समितिका संयोजक वरिष्ठ उपाध्यक्ष सुबेदार मेजर श्रीप्रसाद गुरुङले र्‍यालीमा उत्कृष्टताको घोषणा र महासचिव जुनाकुमारी गुरुङले कार्यक्रम सञ्चालन गरेका थिए ।