पोखरा । पोखरा–११, फूलबारीमा ज्येष्ठ नागरिक भवन निर्माण अन्तिम चरणमा पुगेको छ । सो भवन वैशाख महिनाभित्रै सम्पन्न गर्ने लक्ष्य रहेको उपभोक्ता समितिका अध्यक्ष धर्मराज आचार्यले जानकारी दिए ।

सामाजिक विकास कार्यालय, कास्कीद्वारा संचालित सो आयोजनाको कुल लागत ३८ लाख ९४ हजार रहेको छ । त्यसमध्ये ३ लाख ९४ हजार रुपैयाँ जनसहभागिता रहने जनाइएको छ । गत पुस १४ गते आयोजनाको लागि सम्झौता भएको थियो ।

ज्येष्ठ नागरिकलाई दिवा सेवा सञ्चालन उद्देश्यले गत कात्तिक २३ मा बसेको भेलाले निर्माण गर्ने निर्णयका साथै धर्मराज आचार्यको अध्यक्षतामा ७ सदस्यीय उपभोक्ता समिति गठन गरेको थियो ।

समितिको सचिव हरिप्रसाद बास्तोला, कोषाध्यक्ष नारायणी अधिकारी, सदस्यमा केदारनाथ बास्तोला, नन्दप्रसाद आचार्य, सीता बास्तोला र मेनकादेवी बराल छन् ।