लमजुङ । सुन्दरबजार–९, भोटेओडारमा संचालित पालिकास्तरीय दोस्रो सिर्जनात्मक भलिबल प्रतियोगिताको उपाधि जनविकास सहकारीले जितेको छ । सुन्दरबजार ८, भोटेओडारको मुनलाइट साकोस उपविजेतामा सीमित भयो ।
६५ औं सहकारी दिवस एवं सिर्जना साकोसको रजतजयन्ती अवसरमा सो प्रतियोगिता सञ्चालन गरिएको हो ।
२ दिनसम्म संचालित प्रतियोगितामा मध्यनेपाल–४ को मध्यविन्दु र राइनास–४ को जनशक्ति साकोस सेमिफाइनालिस्ट बने । प्रतियोगितामा ८ टिमले भाग लिएका थिए ।
विजेतालाई आयोजक सिर्जना साकोसका अध्यक्ष रामजी कँडेल र संस्थाका संस्थापक सदस्य एवं सल्लाहकार रमाकान्त अधिकारीले संयुक्त रुपमा पुरस्कार वितरण गरे ।
प्रथम र द्वितीयलाई क्रमशः ५० हजार र ३० हजार साथमा कप, मेडल र प्रमाणपत्र प्रदान गरियो । सेमी फाइनलिस्टलाई नगद १५/१५ हजार दिइयो । पछिल्लो समय भलिबल खेल हराउँदै गएकाले युवाको आकर्षण बढाउने उद्देश्यले सिर्जनात्मक साकोसले सो प्रतियोगिता गरेको हो ।