लेखनाथ । एमाले सचिव पद्मा अर्यालले अबको चुनावमा पाँचदलीय गठबन्धनलाई एमाले एक्लै भारी हुने बताएकी छन् ।

उनले जो कमजोर छ, उसले नै गठबन्धन बनाउने भएकाले एमालेभन्दा कांग्रेस कमजोर भएको पुष्टि हुने बताउँदै गठबन्धनलाई पछारेर एमाले आगामी चुनावबाट देशकै पहिलो शक्ति बन्ने दाबीसमेत गरिन् ।

नेपाल खेलकुद महासंघ गण्डकी प्रदेशको शनिबार प्रथम अधिवेशन उद्घाटन गर्दै पूर्व भूमिसुधार मन्त्री समेत रहेकी नेता अर्यालले सो दाबी गरेकी हुन् । उनले खेलकुद महासंघमा पार्टीको कुनै हस्तक्षेप नहुने बताउँदै खेलाडीलाई नै प्राथमिकता दिने कुरामा पार्टीको जोड रहेको उल्लेख गरिन् ।

खेलकुद महासंघ इञ्चार्ज गोकुल बाँस्कोटाले आगामी निर्वाचनमा पाँचदलीय गठबन्धन एमालेसँग साधारण ढंगले पराजित हुने दाबी गरे । पूर्व सूचना तथा सञ्चार मन्त्रीसमेत रहेका एमाले पोलिट्ब्युरो सदस्य बाँस्कोटाले गठबन्धन स्वार्थको संस्कृति भएको र यसमा जनताको स्र्वाथ नभई केही नेता तथा कार्यकर्ताको निजी स्वार्थ जोडिएकाले गठबन्धनलाई जनताले पराजित गर्ने बताए ।

पूर्व गृहमन्त्री एवं एमाले संगठन विभाग प्रमुख खगराज अधिकारीले अबको चुनावमा एमाले परमादेशबाट नभई जनादेशको आधारमा मूल ढोकाबाटै सरकारको नेतृत्व गर्ने ठोकुवा गरे । उनले चुनावको लागि केही प्रभाव पार्न सकिन्छ कि भन्ने उद्देश्यले पोखरा विमानस्थलको काम सम्पन्न नहुँदै चाबी हस्तान्तरणको नाटक गरिएको आरोप लगाए ।

कार्यक्रममा नेपाल खेलकुद महासंघका केन्द्रीय अध्यक्ष परशुराम बस्नेत, गण्डकी प्रदेशका उपाध्यक्ष मोहन रेग्मी, नेपाल खेलकुद महासंघ, गण्डकी प्रदेश संयोजक विष्णु पुन लगायतले बोलेका थिए ।

गण्डकी प्रदेश संयोजक विष्णु पुनको अध्यक्षतामा सम्पन्न कार्यक्रममा गण्डकी प्रदेश इञ्चार्ज ऋषिराम गौतमले स्वागत र कार्यालय सचिव दीपेन्द्र पौडेलले संचालन गरेका थिए ।

अधिवेशनअन्तर्गत आइतबार चुनावी प्रक्रिया हुने गण्डकी प्रदेशका उपाध्यक्ष मोहन रेग्मीले जानकारी दिए ।