पोखरा । रेडियो अन्नपूर्णले आयोजना गरेको २० औं बृहत् रक्तदान कार्यक्रममा १ सय ६० युनिट रगत संकलन भएको छ । नयाँ रक्तदातालाई रक्तदानप्रति आकर्षित गर्ने उद्देश्यले रेडियोले वार्षिकरुपमा सो कार्यक्रम गर्दै आएको छ ।
‘रक्तदान म पनि गर्छुु, नारासहित भएको कार्यक्रममा १ सय ३३ पुरुष र २६ जना महिलाले रक्तदान गरेका छन् । तीमध्ये ६५ नयाँ रक्तदाता छन् । कार्यक्रममा नेपाल स्वयंसेवी रक्तदाता समूह कास्कीका पूर्व अध्यक्ष तीर्थराज अवस्थीले ६८ औं पटक रक्तदान गरेका छन् ।
गण्डकी प्रदेशका कानुन, सञ्चार तथा प्रदेशसभा मामिला मन्त्री बिन्दुकुमार थापाले पहिलो रक्तदाता नवराज बास्तोलालाई ब्व्लडब्याग हस्तान्तरण गरी कार्यक्रम उद्घाटन गरेका थिए । उनले प्रदेश सरकारले गण्डकी प्रदेशभर रगत निशुल्क उपलब्ध गराउँदै आइरहेको बताए ।
रेडियोका संस्थापक अध्यक्ष विश्वशंकर पालिखेले रेडियोले आफ्नो स्थापनाकालदेखि नै सामाजिक उत्तरदायित्वअन्तर्गत रक्तदान आयोजना गर्दै आएको बताए । रेडियोका निर्देशक विजेश पालिखेले रक्तदानमा उत्साहपूर्ण सहभागि भएर रक्तदान गर्ने रक्तदाताप्रति आभार व्यक्त गरे । कार्यक्रममा पोखरा इन्टरनेट, नेपाल बैंक, नबिल बैंक र बृज सिमेन्टले सहकार्य गरेका थिए । यस्तै, रक्तसंचार केन्द्र पोखरा र फिस्टेल नर्सिङले प्राविधिक सहयोग गरेका थिए ।