पोखरा । पोखरा ९ मा बसोबास गर्ने अपांगता भएका व्यक्तिका लागि अपांगता अभिमुखीकरण तालिम दिइएको छ । साथै उनीहरुका लागि आयआर्जन कार्यक्रम वितरण तथा सहयोगी सामाग्री वितरण गरियो ।
वडास्तरीय अपांगता सरोकार समिति, वडा ९ को आयोजना र सिविआरयस नेपालको संयोजनमा एकदिने कार्यक्रम भएको हो । सो अवसरमा विद्यालय जाने अपांगता भएका विद्यार्थीका लागि स्टेसनरी, झोला, पोशाक वितरण गरियो ।
वडास्तरीय अपांगता सरोकार समितिका अध्यक्ष प्रकाशबहादुर बिकको अध्यक्षतामा भएको कार्यक्रममा वडाध्यक्ष रामराज लामिछानेको प्रमुख आतिथ्यमा भएको कायृक्रममा वडासचिव झम्कनाथ पौडेल, सिबिआरएस नेपालका प्रमुख कृष्ण लामिछानेको उपस्थिति थियो । कार्यक्रमको संचालन सामुदायिक सहजकर्ता चन्द्रदिब्यश्वरी भण्डारी र रति थापाले गरेका थिए ।
अपांगता अभिमुखीकरण कार्यक्रममा अपांगताको परिभाषा, वर्गीकरण, अपांगता परिचयपत्र, राज्यद्वारा प्रदान गरिने सेवा सुविधाहरु र अपांगताको कारण र रोकथामका बारेमा प्रशिक्षण प्रदान गरिएको थियो । प्रशिक्षक विदुर कोइराला र रुद्र थापामगरले सहजीकरण गरेको तालिममा ३५ जना अपांगता भएका व्यक्तिहरु तथा अभिभावकहरुको सहभागिता रहेको थियो ।
१२ जना अपांगता भएका व्यक्तिहरुलाई सिलाइ मेसिन, कुखुरापालन, ठेला पसल, खाजा पसल, किराना पसल र चटपट पसलका लागि आयआर्जन कार्यक्रम सहयोग गरिएको थियो । साथै २ विद्यार्थीलाई विद्यालय पोशाक, स्टेसनरी तथा झोला वितरण गरिएको थियो भने ३ जनालाई सहयोगी सामाग्री वितरण गरिएको थियो ।