पोखरा । वातावरण संरक्षणका लागि महाअभियान कास्कीले फिर्केखोला अतिक्रमण रोक्का गरी पाउँ भनी अख्तियार दुरुपयोग अनुसन्धान आयोग र जिल्ला प्रशासन कार्यालयलाई निवेदन दिएको छ । महाअभियान कास्की संयोजक रामबहादुर पौडेलले बुधबार सो निवेदन दर्ता गराएका हुन् ।
अतिक्रमणबारे महानगरमा पटक–पटक जानकारी गराउँदासमेत गम्भीरतापूर्वक नलिएकाले निवेदन दिएको उनको भनाइ छ । ‘पोखरा वडा नम्बर १८ बाट सुरु भई वडा नम्बर २, ४, ५, ६, ७, ८ हुँदै १७ फेवातालमा समाहित हुने फिर्के खोला चरम अतिक्रमण भइरहेको र पटक–पटक जानकारी गराउँदा समेत पोखरा महानगरपालिकाले गम्भीरतापूर्वक नलिएकाले तत्काले रोक्का गरी आवश्यक छानविन गरी पाउँ,’ निवेदनमा उल्लेख छ ।
संयोजक पौडेलले कुनै व्यक्तिविशेष नभई समग्र फिर्केखोला अतिक्रमणका लागि आफूहरुको अभियान जारी रहेको बताए ।