चैत । पोखरा भाँडा व्यवसायी संघ कास्कीको १५ औं सभा सम्पन्न भएको छ ।
कार्यक्रममा नेपाल उद्योग वाणिज्य संघका पूर्व अध्यक्ष आनन्दराज मुल्मीले करको नाममा सरकारले व्यवसायीलाई आतंकित पार्ने काम गरेको आरोप लगाए । सामान्य व्यावसायिक प्रवद्र्धनका लागि आफ्नै व्यवसाय परिसरमा राखिएको सामान्य सूचना पाटीको समेत कर लिने नीतिका कारण व्यवसायी दोहोरो करको पेलाइमा परेको समेत उनको भनाइ थियो ।
पोखरा उद्योग वाणिज्य संघका वरिष्ठ उपाध्यक्ष पवनकुमार प्रजापतिले कोबिडका कारण विस्थापित व्यवसायीलाई पुनःस्थापित गर्न सरकारले व्यवस्थित र विश्वासिलो नीति लिन अनुरोध गरे ।
कार्यक्रममा एसइई र प्लस टुमा उत्कृष्ट नतिजा ल्याउन सफल व्यवसायीका ३ जना छोराछोरीहरुलाई सम्मान गरिएको थियो । कार्यक्रममा उत्कृष्ट भाँडा व्यवसायी पुरुषोत्तम श्रेष्ठलाई सम्मान गरियो ।
संस्थाले पोखरा १२ स्थित सरस्वती आधारभूत विद्यालयका १ सय ५३ जना विद्यार्थीलाई शैक्षिक तथा खेलकुद सामग्री वितरण गरेको संघका अध्यक्ष नरेन्द्रप्रसाद आचार्यले जानकारी दिए । उनका अनुसार पोखरा क्षेत्रमा आजीवन सदस्य ७६ जना र साधारण सदस्य १ सय ५ जना रहेका छन् । संघको साधारण सदस्यको लागि १५ सय र आजीवन सदस्यका लागि १० हजार तोकेको समेत कार्यक्रममा जानकारी दिइयो ।
संघले १ वर्षमा विविध गतिविधिका लागि ४ लाख ७६ हजार रुपैयाँ खर्च गरेको छ भने क्यालेन्डर प्रकाशन सदस्यता शुल्क र अन्य सहयोगबाट ६ लाख ५० हजार आम्दानी गरेको संघका कोषाध्यक्ष ओकुमार श्रेष्ठले जानकारी दिए ।
कार्यक्रममा संस्थापक अध्यक्ष तथा वडा ३ का वडाध्यक्ष रवीन्द्रबहादुर प्रजु, एलपी ग्यासका सञ्चालक बालकृष्ण कोइराला, प्लास्टिक व्यवसायी संघ अध्यक्ष राम गौतम लगायतले बोलेका थिए । कार्यक्रम सञ्चालन संस्थाका सचिव लक्ष्मीप्रसाद अधिकारीले गरेका थिए ।