पोखरा । ‘घरघर जाऔं, कांग्रेस जिताऔं’ अभियान सफल पार्न नेपाली कांग्रेस गण्डकी प्रदेशले प्रदेशसभा निर्वाचन क्षेत्रमा निर्वाचनकेन्द्रित कार्यक्रम तय गरी शुक्रबारदेखि प्रतिनिधि खटाएको छ ।
प्रदेशका ११ जिल्लाअन्तर्गत ३६ प्रदेशसभा निर्वाचन क्षेत्रमा निर्वाचनकेन्द्रित कार्यक्रम तय गरी ७२ जना प्रदेश सदस्यलाई खटाइएको हो । खटिएका सबै प्रतिनिधिलाई एकदिने प्रशिक्षणसमेत प्रदान गरिएको छ ।
प्रक्षिक्षणमागण्डकी प्रदेशका सभापति शुक्रराज शर्माले पार्टीको सिद्धान्त, नीति र विचारलाई पाटीको तल्लो तहसम्म पुर्‍याउन प्रतिनिधि भूमिका अहम हुने बताए । उनले कांग्रेसले गर्ने निर्णय देश र जनताप्रति हुने गरेको कुरा इतिहासले देखाएको बताए । उनले भने, ‘एमसिसी नेकपा एमालेका पालामा पेश भएको हो । कांग्रेस सत्तामा हुँदा वा नहुँदा जनतामाझ एउटै कुरा गर्छ । कम्युनिष्टका जस्तो रंग फेर्दैन, राष्ट्रहितका पक्षमा भएकाले विरोधमा उत्रेकालाई पनि साथ लिएर पास गरेको हो ।’
कांग्रेसका नेता रामचन्द्र पोखरेलले अभियानमा जनताको विश्वास जितेर आउन प्रतिनिधिलाई सुझाव दिए । प्रदेशका महामन्त्री किरणबाबु श्रेष्ठले कार्यकर्तासँगै पार्टीको सिद्धान्त, नीति र विचारलाई आमजनतामा पुर्‍याउने अभियान सफल हुने विश्वास लिए ।
अर्का महामन्त्रि विष्णु लामिछानेले पार्टीका नेता र कार्यकर्तासहित जनताका घरघरमा गएर निर्वाचन केन्द्रित प्रशिक्षण आवश्यक रहेको बताए । प्रशिक्षकद्वय प्राडा कुसुमाकर न्यौपाने र डा शेरषरमण न्यौपानेले विषयबस्तुमाथि प्रशिक्षण दिएका थिए । प्रतिनिधिले चैत ५ देखि १५ सम्म आफ्नो प्रतिवेदन बुझाउनु पर्ने छ ।