पोखरा । सेती नदी तिरभिर संरक्षण समूहले रामघाट परियोजनामा आफूहरुलाई पनि सहभागी गराउन माग गर्दै महानगरलाई ज्ञापनपत्र बुझाएको छ । समूहमा आबद्ध ८ वटा संस्थाहरुले संयुक्त रुपमा बुधबार ज्ञापनपत्र बुझाएका हुन् । बतास समूहलाई ३५ वर्षका लागि सेती नदीमा ड्याम निर्माण गरेर ढुंगा, गिट्टी, बालुवालगायत सामग्री उत्खनन् गर्न दिने गरी रामघाट परियोजना सञ्चालन गर्न दिन लागेकाले सो परियोजनामा आफूहरुलाई पनि सहभागी गराउन माग गरेका हुन् ।
सेती नदी तिरभिर संरक्षण समूहले परियोजनामा आफूहरुलाई १० प्रतिशत सेयर लगानी दिन माग गरेको छ । त्यस्तै, स्थानीयलाई रोजगारीमा प्राथमिकता, शवदाहको उचित व्यवस्थापन, शौचालय, प्रतीक्षालयलगायत संरचना निर्माणको सुनिश्चितता गर्न माग गरेको छ । माथिल्लो सिद्धमार्ग टोल विकास संस्था, शान्तिवन टोल विकास संस्था, शान्तिवन रामघाट मजदुर समिति, नयाँबजार क्लब, शान्तिदर्शन युवा क्लब, सिद्धमार्ग आमा समूह, शान्ति वन आमा समूह र सिद्धमार्ग टोल विकास संस्थाले ज्ञापनपत्र बुझाएका हुन् ।
समूहले आफ्ना माग पूरा नभए एकताबद्ध भई संघर्षमा उत्रिने साथै त्यसबाट क्षति पुगेमा त्यसको जिम्मेवार स्वयं महानगरपालिका हुने चेतावनी दिएको छ ।