पोखरा । पोखराको कन्या क्याम्पसले गुणस्तर प्रत्यायनकृत (क्युएए ) को मान्यता पाएको छ । विश्व विद्यालय अनुदान आयोगले आयोजना गरेको एक कार्यक्रमबीच कन्या क्याम्पसलाई गुणस्तर प्रत्यायनकृत (क्युएए ) को प्रमाणपत्र प्रदान गरेको हो ।
अनुदान आयोगबाट उक्त प्रमाणपत्र अर्थात् (क्युएए ) प्राप्त गरेपछि कन्या क्याम्पसको शैक्षिक गुणस्तरलाई पनि अन्तर्राष्ट्रिय क्षेत्रमा मान्यता दिइने छ । क्याम्पसले पाएको क्युएएको बारेमा बुधबार पत्रकार सम्मेलन गरी जानकारी दिएको हो । कार्यक्रममा सहभागी हुन कन्या क्याम्पसले पनि विभिन्न क्षेत्रका व्यक्तित्वलाई आमन्त्रण गरेको थियो । कार्यक्रममा सञ्चालक समितिका सदस्यहरु, नीलकण्ठ माविका प्रधानध्यापक विष्णु सिलवाल,विद्यार्थी संगठनका प्रतिनिधिहरु र स्ववियुका प्रतिनिधिहरु, उपप्रध्यापक र सञ्चारकर्मीहरुको सहभागिता थियो ।
कन्या क्याम्पसका सञ्चालक समितिका अध्यक्ष शिवलाल मल्लले कन्या क्याम्पसले क्युएए प्राप्त गरेपछि सिंगो जिल्लाको शैक्षिक पहिचान र प्रतिष्ठा बढेको धारणा राखे । सहायक क्याम्पस प्रमुख चित्रबहादुर श्रेष्ठले क्याम्पसले क्युएए प्राप्त गरेपछि यो गुणस्तरलाई कसरी जोगाउने भन्ने चुनौती थपिएको विचार व्यक्त गरे ।