लेखनाथ । राइजिङ स्टार युथ क्लबले पोखरा–२७ रिठ्ठेपानीमा पुस्तकालयको स्थापना गरेको छ ।
क्लबको ३ लाख ५० हजार र विभिन्न व्यक्ति एवं संघसंस्थाबाट प्राप्त ७५ हजार गरी ४ लाख २५ हजार लागतमा पुस्तकालयको स्थापना गरिएको क्लब अध्यक्ष विष्णुप्रसाद गुरुङले जानकारी दिए ।
पुस्तकालय उद्घाटन गर्दै वडाध्यक्ष पूर्णकुमार गुरुङले पुस्तक पढ्ने बानीको विकास गर्न आग्रह गरेका थिए ।
यस्तै भूपू सैनिक क्लब अध्यक्ष सुवेदार मेजर जगबहादुर गुरुङले सचेत नागरिक एवं सभ्य समाज निर्माणमा पठन संस्कृति अपरिहार्य भएको बताए ।
क्लब अध्यक्ष विष्णुप्रसाद गुरुङको अध्यक्षतामा सम्पन्न कार्यक्रममा सल्लाहकार यमप्रसाद गुरुङले स्वागत र कोषाध्यक्ष सागर गुरुङले सञ्चालन गरेका थिए । पुस्तकालयमा विभिन्न क्षेत्र एवं उमेर समूहका लागि उपयुक्त धार्मिक, साहित्यिक एवं ऐतिहासिक महत्वका पुस्तक एवं पत्रपत्रिका रहेको क्लबले जानकारी दिएको छ ।