पोखरा । पोखरामा एभियन इन्फ्लुएन्जा (बर्ड फ्लु) को संक्रमण फेला परेको छ । पोखरा महानगरपालिका वडा १५ र १७ का विभिन्न ठाउँमा संक्रमण फेला परेको हो ।
स्थानीय किसानले पालेका कुखुरा दैनिक मर्न थालेपछि परीक्षण गर्दा संक्रमण पुष्टी भएको कृषि मन्त्रालयले जनाएको छ । फागुन ६ गते पोखरा १५ का खुसीमान गुरुङले पालेको फार्ममा कुखुरा मरेपछि त्यसको परीक्षणका लागि जिल्ला प्रयोगशाला ल्याएका थिए । त्यहाँको आरडिटी परीक्षणमा पोजिटिभ देखिएपछि थप परीक्षणका लागि काठमाडौं पठाइएकोमा फागुन १५ गते संक्रमण पुष्टी भएको हो ।
यस्तै, पोखरा १७ का खेमबहादुर क्षत्रीको कुखुरा पनि परीक्षणका लागि पठाइएको थियो । उनको कुखुरामा समेत बर्ड फ्लु पुष्टी भएको जिल्ला बर्ड फ्लु नियन्त्रण कक्षका सञ्चार अधिकृत डा. गृष्म न्यौपानेले जानकारी दिए ।
रोगको संक्रमण फेला परेसँगै संक्रमित क्षेत्रमा सतर्कता उच्च बनाइएको छ । जिल्ला बर्ड फ्लु रोग नियन्त्रण समितिको बैठक बसेर त्यस क्षेत्रलाई संक्रमित क्षेत्र घोषणा गरिएको छ भने पन्छीजन्य कारोबारमा बन्देज लगाइएको छ । संक्रमण भेटिएका खोरमा चैत २९ सम्म पन्छीपालन गर्न पनि रोक लगाइएको छ । ‘खोरको किसान भकाभक म¥यो भनेर किसान आफंैले उपचारका लागि ल्याउनुभयो । हामीले टेस्ट ग¥यौं । बर्ड फ्लु पोजिटिभ देखिएपछि काठमाडौं पठायौं । त्यहाँ प्रमाणित भयो,’ डा. न्यौपानेले भने । संक्रमित क्षेत्रलाई संकटग्रस्त घोषणा गरेर थप काम अघि बढाइएको उनको भनाइ छ ।
चारकिल्ला भित्रका पन्छी र पन्छीजन्य पदार्थ नष्ट गर्ने काम सुरु गरिएको छ । संक्रमण देखिएको फार्म नै इपिसेन्टर मानेर चारकिल्ला निर्धारण गरिएको हो । पोखरा वडा १५ र १७ मा ३९ घरधुरीका ३ सय ८१ वटा स्थानीय कुखुरा मारिएको छ । यस्तै, १२ वटा हास, ५१ बट्टाई, ५ वटा टर्की, ५ सय ९ वटा अण्डा, २२ केजी कुखुराको मासु, ३ सय २२ किलो दाना र ३ हजार ८ सय ५० किलो सुली नष्ट गरिएको छ ।

पोखरा वडा १५ र १७ मा बर्ड फ्लु संक्रमण भेटिएको हो

कास्कीमा सन् २०१९ पछि अहिले वर्ड फ्लु देखिएको हो । कास्कीको मादी गाउँपालिकास्थित याङ्जाकोटमा पछिल्लो समय संक्रमण भेटिएको थियो । २०७३ फागुनमा पनि खाल्टे मसिनामा संक्रमण फैलिएको थियो । पोखरामा पहिलो पटक सन् २०१० मा कुखुरामा वर्ड फ्लु संक्रमण पुष्टी भएको हो ।
संक्रमणकाल घोषित क्षेत्रको निर्मलीकरण गर्न प्राविधिक टोली खटाइएको छ । उनीहरुले वरपरका खोर सफाइदेखि पन्छी नष्ट गरिरहेका छन् । मारिएका पन्छी र पन्छीजन्य पदार्थको क्षतिपूर्ति सरकारले नै राहतको रुपमा उपलब्ध गराउने जिल्ला बर्ड फ्लु नियन्त्रण कक्षका कन्ट्रोल रुम इन्चार्ज शम्भुराज पाण्डेले बताए । योसँगै फागुन १८ देखि २७ सम्म जोखिम क्षेत्रमा पन्छी र पन्छीजन्य पदार्थको ओसारपसारमा रोक लगाइएको छ । ‘घरमा आफ्नै परिवारका लागि पालेका रहेछन् । छत र सानो खोरमा पालिएकोले धेरै क्षति भएको छैन भन्ने आकलन गरेका छौं,’ उनले थपे, ‘खुला ठाउँ भएकोले वरिपरि पनि गएको हुन सक्ने आशंका छ । हामी खोजी गरिरहेका छौं ।’ अव्यवस्थित पालन र कारोबारका कारण उक्त क्षेत्र सधैं बर्ड फ्लुको उच्च जोखिममा छ । केही वर्षअघि पोखरा–१४, मझेरीपाटन क्षेत्रमा समेत संक्रमण फैलिएको थियो ।
बर्ड फ्लु देखिएपछि उपभोक्ता र किसानलाई सचेत रहन पाण्डेले आग्रह गरेका छन् । बर्ड फ्लुको भाइरस २३ डिग्री सेल्सियस तापक्रममा मर्छ । कुखुराको खोरमा काम गर्ने र मासु काट्ने व्यक्तिले मास्क लगाउने, पञ्जा लगाएर काम गर्ने गर्नुपर्छ । तापक्रम बढेपछि भाइरस मर्ने भएकोले उपभोक्ता आत्तिहाल्नु पर्ने अवस्था नरहेको पाण्डे बताउँछन् ।