पोखरा । हिन्दु महासंघ नेपाल कास्की र लायन्स क्लब अफ पोखरा भिजिटको संयुक्त आयोजनामा मंगलबार पोखरामा रक्तदान कार्यक्रम भएको छ । कार्यक्रममा ३६ युनिट रगत संकलन भएको छ ।
विश्व हिन्दु महासंघ नेपालका वरिष्ठ उपाध्यक्ष शंकर खरालले रक्तदान कार्यक्रमले कसैको ज्यान बचाउन सहयोग पुग्ने बताए । सामाजिक सेवामा सबैभन्दा ठूलो सेवा रक्तदान रहेको बताएका खरालले रक्तदान कार्यक्रमलाई निरन्तरता दिनुपर्नेमा जोड दिए ।
गुरु योगी नरहरिनाथको १०८ औं जन्मजयन्ती तथा महाशिवरात्रीको अवसरमा पुण्ड दानस्वरुप रक्तदान कार्यक्रम आयोजना गरिएको विश्व हिन्दु महासंघ कास्की अध्यक्ष पार्वती पौडेलको भनाइ थियो ।
सामाजिक सेवा गर्ने उद्देश्यले स्थापित क्लबले रक्तदानलाई उच्च महत्व दिंदै चिप्लेढुंगा मानवअधिकार चोकमा सो कार्यक्रम गरेको क्लब अध्यक्ष सुवास पौडेलले जानकारी दिए ।
कार्यक्रमका विश्व हिन्दु महासंघ कास्की संयोजक मेनुका बरालले रगतको माग पूरा गर्न नियमित रगतको आवश्यकता हुने बताइन् । कार्यक्रममा नेपाल रेडक्रस सोसाइटी कास्की शाखाको प्राविधिक सहयोग थियो ।