लेखनाथ । पोखरा ३२ मा परोपकार आमा समूहको भवन तथा शिव मन्दिर उद्घाटन गरिएको छ ।
गण्डकी प्रदेशका कानुन, सञ्चार तथा प्रदेशसभा मामिला मन्त्री विन्दुकुमार थापाले सोको उद्घाटन गर्दै पोखराको प्रवेशद्वार पोखरा–३२ का विकास निर्माण प्रदेश सरकारको प्राथमिकतामा परेको बताए । मन्दिर, पार्टीपौवा निर्माणका साथै सभ्य समाज निर्माणमा आमा समूहले विशिष्ट योगदान गर्दै आएको बताउँदै उनले परोपकार आमा समूहका विकास निर्माण लगायतका हरेक गतिविधिमा आफ्नो साथ र सहयोग हुने विश्वास व्यक्त गरे ।
पोखरा ३२ का वडाध्यक्ष अक्कलबहादुर कार्कीले परोपकार आमा समूहले विगतदेखि नै गर्दै आएका काम प्रशंसनीय भएको बताए । उनले विकास निर्माणका लागि यो वा त्यो नभनी सबैको सामूहिक प्रयास आवश्यक हुनेमा जोड दिए ।
गोगन माविका अध्यक्ष मेघराज पौडेलले ऋणमा रहेर पनि परोपकार आमा समूहले विकास निर्माणका काममा देखाएको सक्रियता प्रशंसनीय भएको बताउँदै समूहका काममा सबैको साथ र सहयोग आवश्यक हुने बताए ।
नेपाल रेडक्रस सोसाइटी पोखरा–३२ का अध्यक्ष किसान परियारले सकारात्मक सोचका साथ आमा समूहले रत्यौली लगायत विभिन्न सांस्कृतिक कार्यक्रम गरी पैसा जोगाएर सामाजिक काममा लगाएको बताए ।
समाजसेवी मोहनकुमार प्रधानले आमा समूहको सक्रियता प्रशंसनीय भएको बताउँदै सबैको एकताबद्ध प्रयासमा यस क्षेत्रको विकासका गतिविधि अघि बढाउन सकिनेमा जोड दिए ।
नेकपा माओवादी केन्द्रका नगर कमिटी सदस्य अर्जुन मल्लले बाढी तथा भूक्षयबाट प्रभावित पोखरा–३२ मा वर्षायाममा आउने पानीको उचित निकास आवश्यक रहेकोमा जोड दिए । समाजसेवी शरणकुमार प्रधानले आमा समूहले गोगन माविमा बनाएको दुईकोठे भवन, घाटमा निर्माण गरेको प्रतिक्षालय आदि अनुकरणीय कार्य भएको स्मरण गरे ।
समाजसेवी शिवजी लामिछानेले सामाजिक गतिविधिमा महिलाहरूको भूमिका महत्वपूर्ण हुँदै आएको धारणा राख्दै परोपकार आमा समूहका कार्यको प्रशंसा गरे ।
समूह अध्यक्ष लक्ष्मी प्रधानको अध्यक्षतामा भएको कार्यक्रमको संचालन सचिव निर्मला भट्टराई ढकालले सञ्चालन गरेकी थिइन् । कार्यक्रममा पोखरा रेडिमिक्सका अध्यक्ष नारायण गुरुङ, पूर्व वडा अध्यक्ष प्रकाशचन्द्र पागल लगायतले आमा समूहको कार्यको प्रशंसा गरे । सो अवसरमा मन्दिर तथा भवन निर्माणका सहयोगदातालाई सम्मान गरिएको थियो ।