पोखरा, १० फागुन । र्‍यापर आशीष राना ‘लाहुरे’ रिहा भएका छन् । लागु औषसम्बन्धी कसूरमा गत पुस १४ मा पक्राउ परेका उनी कास्की जिल्ला अदालतको आदेशले मंगलबार ५० हजार धरौटीमा रिहा भएका हुन् ।

सो अभियोगमा लाहुरेसँगै पक्राउ परेका अन्य ३ जना भने पुर्पक्षका लागि जेल चलान भएका छन् । जिल्ला अदालतका सूचना अधिकारी नील पनेरुले अदालतमा मंगलबार थुनछेक बहसपछि अदालतले सो आदेश दिएको बताए ।

जेलचलान हुनेमा पोखरा २१ घर भई हाल पोखरा १७, छोरेपाटनका ३९ वर्षीय ध्रुवबहादुर थापा, रुपा ७ घर भइ हाल पोखरा १, बगर बस्ने ३० वर्षीय नवीनकुमार गुरुङ र स्याङ्जाको भिरकोट ६ घर भइ हाल पोखरा ८, सभागृहचोक बस्ने २२ वर्षीया सुस्मिता गुरुङ हुन्।

गत पुस १४ मा पोखराको न्यूरोडबाट प्रहरीले उनीहरुलाई नियन्त्रणमा लिएको हो । खानतलासीमा नवीनको साथबाट ०.५१ ग्राम लागुऔषध ब्राउन सुगर भेटाएको थियो । प्रारम्भिक अनुसन्धानक्रममा पोखरा सभागृहचोक बस्ने सुस्मिताको कोठाभित्र लुकाइ छिपाइ राखेको अवस्थामा लागुऔषध ब्राउन सुगर १२.५० ग्राम फेला परेको थियो । साथै प्रहरीले सुस्मिताको साथबाट ३८ हजार, ५ थान मोबाइल सेट, ग २१ प ३३ २३ नम्बरको स्कुटर समेत बरामद गरिएको थियो ।

लाहुरे हिमालयन रोडिजका निर्णायक पनि हुन् । उनको लाहुरे, हाउडे, केस नम्बर ४०२, नेपहपको बाटो, मेरो सोल्टा, सुपर सागा लगायत गीत चर्चित छन् । उनले ताण्डव सिनेमामा पनि अभिनय गरेका छन् । लाहुरे लागुऔषध सेवनकर्तामात्र रहेको प्रहरीको प्रारम्भिक निष्कर्ष थियो।