पोखरा । नव आदर्श सामुदायिक विकास संस्थाले आयोजना गरेको रक्तदानमा ४५ युनिट रगत संकलन भएको छ । हरेक वर्ष फागुन ७ गते प्रजातन्त्र दिवसका दिन संस्थाले रक्तदान गर्दै आएकोमा यसपटकको कार्यक्रम २२ औं भएको संस्थाका अध्यक्ष रेश्मा शेरचन अधिकारीले बताइन् ।
कास्कीमा रगतको अभाव भइरहेको बेला नवआदर्श सामुदायिक विकास संस्था लामाचौर पोखराले गरेको रक्तदान कार्यक्रमबाट थप टेवा मिलेको रक्तसञ्चार केन्द्र पोखराले जनाएको छ ।
आइएनएफ नेपालका कार्यकारी निर्देशक कृष्णबहादुर अधिकारीले पहिलो रक्तदाता एवं संस्थाका पूर्व अध्यक्ष बुद्धिबहादुर खत्री क्षेत्रीलाई ब्लडब्याग हस्तान्तरण गर्दै रक्तदान शुभारम्भ गरे । क्षेत्रीले संस्थाको कार्यक्रममा १८ औं पटकको रक्तदान गरिसकेका छन् भने पूर्व अध्यक्ष नवीन अधिकारीले संस्थामा २१ पटक रक्तदान गरेका थिए ।
रक्तदान कार्यक्रममा सह आयोजकमा युवा रेडक्रस सर्कल गण्डकी बोर्डिङ स्कूल, जुनियर रेडक्रस सर्कल इन्द्रराज्य लक्ष्मी मावि लामाचौर र एलसी ब्रदर्श र ह्याप्पी क्लब पश्चिमाञ्चल क्याम्पसको सहकार्यमा रक्तदान कार्यक्रम आयोजना गरिएको थियो ।
संस्थाका अध्यक्ष रेश्मा शेरचन अधिकारीको अध्यक्षतामा भएको कार्यक्रम सञ्चालन सचिव थिरबहादुर थापाले गरेका थिए ।