म्याग्दी । म्याग्दीको धवलागिरि गाउँपालिका वडा नम्बर २ लमसुङस्थित बाढीले बगाएको दरखोला दोस्रो लघुजलविद्युत परियोजना पुनर्निर्माण भएको छ । २० भदौमा दरखोलामा आएको बाढीले ४३ किलोवाट क्षमताकोे दरखोला दोस्रो लघुजलविद्युत परियोजनाको विद्युत गृह,बाँध र कुलो बगाएपछि गाउँ अन्धकार बनेको थियो । सो परियोजना पुनर्निर्माण भएपछि करिब साढे ५ महिना पछि विद्युत सेवा सुचारु भएको छ ।
गाउँपालिकाबाट विनियोजित १२ लाख रुपैयाँ र गण्डकी प्रदेश सभा सदस्य नरदेवी पुनको सिफारिसमा स्थानीय पूर्वाधार विकास कार्यक्रम मार्फ १० लाख रुपैयाँ गरी २२ लाख रुपैयाँ लगानीमा परियोजना पुनर्निर्माण भएको उपभोक्ता समितिका अध्यक्ष ज्ञानबहादुर पाइजाले जानकारी दिए । गत पुस महिनाबाट बाढीले बगाएको परियोजना मर्मतको काम थालिएकोमा आइतबार परीक्षण उत्पादनको काम सम्पन्न भएको पाइजाले बताए ।
परियोजनाबाट गाउँका ३ सय ५५ घरधुरीमा विद्युत सेवा पुगेको छ । बत्ती बलेपछि टुकीको भरमा विद्यार्थीहरुले पढ्नुपर्ने बाध्यता हटेको स्थानीयवासी भक्तबहादुर सिंकिजा पुन मगरले बताए । मोबाइल चार्ज, टेलिभिजन हेर्न र बालबालिकाको अध्ययनमा समेत सहजता मिलेको छ भने विद्युत सेवा सुचारु भएपछि गाउँमा रहेका कुटानी पिसानी गर्ने मिल, फर्निचर उद्योग र मासुपसल लगायतका घरेलु उद्योगहरुलाई राहत मिल्ने भएको छ ।
आइतबार परियोजनाको निरीक्षणमा पुगेकी गाउँपालिका अध्यक्ष थमसरा पुनले परीक्षण उत्पादन सफल भएको र स्थानीय उपभोक्ताहरुको बैठक बसेर नियमित रुपमा विद्युत सेवा सुचारु गर्ने तयारी भएको जानकारी दिइन् । ‘दुर्गम बस्ती महिनौंदेखि अन्धकारमा रहँदा निकै नै सास्ती भएको थियो, पालिकाले यहाँको समस्यालाई गम्भीरताका साथ लिएर समाधानमा जुटेपछि स्थानीयबासीलाई अन्धकारमै बसिरहनुपर्ने बाध्यता हटेको छ’, अध्यक्ष पुनले भनिन् ।
बाढीले बगाएर क्षतिग्रस्त बनेको परियोजनाको टर्वाइन, एलसी बोर्ड, रनर, अर्थिङ प्लेट लगायतका मेसिन उपकरणहरु नयाँ फेरिएको छ भने मुहानमा २५ मिटर कुलो निर्माण र मर्मतको काम गरिएको छ । त्यसैगरी विद्युतगृह भवन नयाँ निर्माण गरिएको छ । खोलाको किनारदेखि केहीमाथि सुरक्षित ठाउँमा विद्युतगृह निर्माण भएको कारण परियोजनाको उत्पादनसमेत घटेर ३५ किलोवाटमा सीमित भएको समितिले जनाएको छ ।
२०७६ मा वैकल्पिक ऊर्जा प्रवद्र्धन केन्द्रको ८५ लाख ९७ हजार, जनश्रमदान ३३ लाख गाउँपालिकाको ५० लाख र स्थानीयवासीबाट चन्दा सहयोगबाट प्राप्त ५ लाख ३ हजार लागतमा परियोजना निर्माण गरिएको थियो । गाउँपालिका अध्यक्ष पुन, प्राविधिक टोली, वडा अध्यक्ष गमबहादुर विक लगायत जनप्रतिनिधि ,वडा सचिव गिरिराज शर्मा, युवा क्लब र स्थानीयवासीको उपस्थितिमा विद्युत परीक्षण गरिएको थियो ।