पोखरा । ‘विद्यालयमा रंगमञ्च, अर्थपूर्ण बाल सहभागिताको आधार’ मूलमन्त्रका साथ दोस्रो संस्करणको गण्डकी प्रदेशस्तरीय विद्यालय नाटक महोत्सव फागुन १३ देखि हुने भएको छ । कोरोनाको तेस्रो भेरियन्टका कारण यसअघि निर्धारित मिति पर सरेको थियो ।
आयोजक पोखरा थिएटरले फागुन १३ देखि १६ सम्म पोखरा थिएटरको गन्धर्व नाटकघरमा मञ्चनको तय गरेको छ ।
महोत्सवमा गण्डकी प्रदेशका ८ जिल्लाका १२ नाटक छनोट भएको पोखरा थिएटरका अध्यक्ष परिवर्तनले जानकारी दिए । उनका अनुसार दैनिक ३ नाटकका दरले ४ दिनसम्म नाटक मञ्चन गरिनेछ ।
वरिष्ठ कलाकार प्रकाश घिमिरेको संयोजकत्वमा ३ सदस्यीय निर्णायक समितिले नाटक छनोट गरेको हो । सदस्यमा निर्देशक एवं कलाकार माओत्से गुरुङ र कलाकार प्रमिला तुलाचन थिए । छनोट प्रक्रियामा उनीहरुले सम्बन्धित ठाउँको अवलोकनसमेत गरेका थिए ।
महोत्सवमा गण्डकी प्रज्ञा–प्रतिष्ठानको प्रमुख सहकार्य एवं नेपाल संगीत तथा नाट्य–प्रज्ञा प्रतिष्ठान काठमाडौं र पोखरा प्रज्ञा प्रतिष्ठानले सहकार्य गरेका छन् ।
गएको वर्षदेखि पोखरा थिएटरले प्रदेशस्तरीय विद्यालय नाटक महोत्सवको आयोजना सुरुआत गरेको हो । त्यसअघि पोखरा महानगरस्तरीय नाटक महोत्सव हुन्थ्यो ।