पोखरा । गण्डकी प्रदेशका प्रमुख सचिव डा. दामोदर रेग्मीको मंगलबार बिदाइ गरिएको छ । मुख्यमन्त्री कृष्णचन्द्र नेपाली पोखरेल, सरकारका प्रवक्ता तथा मन्त्री कुमार खड्का, मन्त्री डोवाटे विकसहितको उपस्थितिमा उनको बिदाइ गरिएको हो।

असार २८ गते प्रमुख सचिवको जिम्मेवारी सम्हाल्न आएका रेग्मीको युवा तथा खेलकुद मन्त्रालयमा सरुवा भएको छ । गण्डकीको प्रमुख सचिवको जिम्मेवारी रविलाल पन्थले पाएका छन् । उनी बुधबार प्रदेशमा हाजिर हुँदैछन्।

कार्यक्रममा मुख्यमन्त्री कृष्णचन्द्र नेपाली पोखरेलले प्रमुख सचिवसँग करिव ५ महिना सँगै काम गर्दा निकै सहजताका साथ बितेको बताए । राजनीतिक नेतृत्वले लिएको लक्ष्यलाई कार्यान्वयनमा लैजान कर्मचारीतन्त्रबाट पूर्ण सहयोग अपेक्षा गरिने भन्दै डा. रेग्मीले यसमा केही कसर नराखी सहयोग गरेको बताए । उक्त अवसरमा मन्त्री कुमार खड्का र डोबाटे विश्वकर्माले यो अवधिमा डा. रेग्मीले सरकार सञ्चालनमा धेरै सहयोग गरेको भन्दै प्रशंसा गरे । प्रमुख सचिव डा. रेग्मीले १ सय २८ दिनको गण्डकी प्रदेशको बसाइ आफ्नो जीवनको अविस्मरणीय क्षण बनेको बताए । प्रदेशमा रहँदा क्षमताले भ्याएसम्म काम गरेको भन्दै उनले संघीयता कार्यान्यनका लागि स्थानीय तह र प्रदेश सरकार अझ सशक्त हुनुपर्ने भनाइ राखे । मुख्यमन्त्री तथा मन्त्रिपरिषदको कार्यालयका सचिव रामप्रसाद आचार्य, शिक्षा, संस्कृति, विज्ञान प्रविधि तथा सामाजिक विकास मन्त्रालयका सचिव विनोदबहादुर कुँवरले उक्त अवसरमा शुभकामना व्यक्त गरे।