पोखरा । पशु स्वास्थ्य तालिम तथा परामर्श सेवा, पोखराको २१ औं वार्षिक साधारणसभा शनिबार भएको छ । साधारणसभाको उद्घाटन प्रमुख अतिथि भूमि व्यवस्था, कृषि, सहकारी तथा गरिबी निवारण मन्त्रालय, गण्डकी प्रदेशको योजना मूल्यांकन महाशाखा प्रमुख डा. गृष्म नेउपानेले गरेका थिए ।
कार्यक्रममा पशु सेवा तालिम केन्द्र, गण्डकी प्रदेशका प्रमुख डा. शोभा शर्मा, गैरसरकारी संस्था कास्कीका अध्यक्ष पदम पहारी, सीप हस्तान्तरणद्वारा सशक्तीकरण (नेस्ट) पोखराका कार्यकारी निर्देशक कुम गुरुङ, पोखरा महानगरपालिकाको पशु सेवा महाशाखाका प्रमुख नवराज अधिकारी, भेटेरिनरी हस्पिटल तथा पशु सेवा विज्ञ केन्द्र, कास्कीका सहदेव पौडेल लगायतले बोलेका थिए ।
पशु स्वास्थ्य तालिम तथा परामर्श सेवाका अध्यक्ष शिवकुमार प्रधानको अध्यक्षतामा भएको कार्यक्रमको सञ्चालन सचिव लीला गुरुङले गरेका थिए ।
तालिम संयोजक भरत पोखरेलका अनुसार पोखरामा प्रधानकार्यालय रहेको पशु स्वास्थ्य तालिम तथा परामर्श सेवाले २० वर्षदेखि विभिन्न खालका तालिम प्रदान गर्दै आएको छ । यस अवधिमा ३५ दिने ग्रामीण पशु स्वास्थ्य कर्याकर्ता तालिम १ हजार ८ सय ३० जनालाई दिइएको छ भने ७ दिने आधारभूत कृषि तालिम ८ सय बढीले लिइसकेका छन् । यस्तै, संस्थाले ग्रामीण पशु स्वास्थ्य कार्यकर्ता पुनर्ताजगी तालिम, सामुदायिक पशु व्यवस्थापन कार्यकर्ता तालिम, कुखुरा स्वास्थ्य तथा व्यवस्थापन तालिम, बंगुर स्वास्थ्य तथा व्यवस्थापन तालिम, बाख्रापालन तालिम, व्यावसायिक दूध उत्पादन र प्रशोधन तालिम लगायत डेढ दर्जन तालिम प्रदान गर्दै आएको छ ।