पोखरा । नेकपा (एकीकृत समाजवादी) निकटको समाजवादी प्रेस संगठन कास्की संयोजकमा गणेश बराल चयन भएका छन् । पोखरामा बिहीबार भेलाले बरालको संयोजकत्वमा ११ सदस्यीय समिति सर्वसम्मत रुपमा चयन गरेको हो ।
समिति सहसंयोजक वीरेन्द्र सापकोटा र जैनव खातुन छन् भने सचिव भीमबहादुर थापा, सहसचिव बालकुमारी पौडेल (तारा) र कोषाध्यक्षमा रोहित बस्नेत छन् । सदस्य उमा विक, रोशन अधिकारी, कपिल पौडेल, समीक्षा केसी र खालिदा बेगम चयन भएको जनाइएको छ ।
भेला उद्घाटन गर्दै नेकपा (एकीकृत समाजवादी) कास्की अध्यक्ष धनराज आचार्यले राजनीतिक विकृति, भ्रष्टाचार र कुशासनविरुद्ध निष्पक्ष भएर कलम चलाउन उनले समाजवादी प्रेस संगठनमा आवद्ध पत्रकारलाई आग्रह गरे । उनले नेकपा (एकीकृत समाजवादी) पार्टी र यसका नेता गलत बाटोमा लागे सोविरुद्ध सबैभन्दा पहिला समाजवादी प्रेस संगठनमा आवद्ध पत्रकारले नै कलम चलाउनुपर्ने सुझाव दिए ।
समाजवादी प्रेस संगठनका संस्थापक केन्द्रीय सदस्य नवराज सुवेदीले समाजवादी प्रेस संगठनमा आवद्ध पत्रकार सबैमा उदाहरणीय बन्नुपर्ने बताए । भेलामा नेकपा (एकीकृत समाजवादी) कास्कीका उपसचिव एवं प्रचार प्रमुख पूर्ण लामा, गण्डकी प्रदेश समिति इन्चार्ज श्रीराम सिग्देल लगायत बोलेका थिए ।