हेमजा । पोखरा–८, रत्नचोकस्थित बार्दली बचत तथा ऋण सहकारी संस्था लिको ९ औं वार्षिक साधारणसभा आइतबारदेखि सुरु भएको छ ।
सभाको उद्घाटन गर्दै गण्डकी प्रदेश अर्थ विकास समितिका सभापति तथा सहकारीका सल्लाहकार दीपक कोइरालाले नेपालको अर्थतन्त्रमा सहकारी संस्थाको भूमिका महत्वपूर्ण रहँदै आएको बताउँदै संस्था स्थापनासँगै स्थानीयहरु बीच सहकार्यको भावना विकास हुँदै गएको औंल्याए ।
उनले सेयर सदस्य सबै मिली सहकारीको बृद्घि, विकासमा लाग्नुपर्ने भन्दै स्थापनाको छोटो समयमा सहकारीले उल्लेख्य प्रगति गरेको चर्चा पनि गरे । त्यस अवसरमा उत्कृष्ट कारोवारकर्ता ६१ सेयर सदस्यलाई सम्मान गरियो ।
कार्यक्रममा कारोवारकर्ता सम्मानित सगरमाथा सहकारीका अध्यक्ष केशवराज घिमिरे, सेयर सदस्यद्वय लोकनाथ सुवेदी र रचना प्रधान, सल्लाहकार गोमादेवी पराजुलीले पनि भनाइ राख्दै सहकारी संस्थामा सहकार्यको भावनालाई ख्याल गर्नुपर्ने बताए ।
सहकारीका उपाध्यक्ष ऋषिराम आचार्यको अध्यक्षतामा सम्पन्न उद्घाटन कार्यक्रममा कोषाध्यक्ष डिल्लीराम पौडेलले स्वागत तथा सचिव मोहन सापकोटाले सञ्चालन गरे । सभा यहि असोज ३० गतेसम्म चल्नेछ ।