पोखरा । पोखरा सिद्धार्थचोकको बाटोमा आइतबार ११ बजे बाँस तेस्र्याइयो । बाँसको बीचमा ब्यानर झुन्ड्याइएको थियो । लेखिएको थियोः ‘फिर्केपुल निर्माण तथा डाइभर्सनका लागि विरोध प्रदर्शन’ ।
विरोध कार्यक्रमको आयोजक थियो सिद्धार्थ मार्ग फिर्के पुल सरोकार समिति र सिद्धार्थ व्यवसायी संघर्ष समिति । उनीहरुले नै पुल निर्माण ढिलाइ भएकोमा चोकमा चक्काजाम गराएका हुन् । दुवै समितिका मानिसहरु बाँसको घेराभित्र बसेर विरोध गरिरहेका थिए । जनप्रतिनिधिहरुले समयमै पुल बनाउँछु भनेर झुक्याएको आरोप लगाइरहेका थिए । उनीहरुको अनुहारमा व्यापारमा घाटा व्यहोर्नु परेको आक्रोश प्रष्ट देखिन्थ्यो । जनप्रतिनिधिहरुलाई तुरुन्त आउन उनीहरुले आग्रह गरिरहेका थिए । वडाध्यक्षहरु आए कालोमासो दल्नेसम्मको धम्की थियो उनीहरुको । एकैछिनमा वडानम्बर ५ का अध्यक्ष धनबहादुर नेपाली र ४ का अध्यक्ष शंकरप्रसाद बास्तोला विरोध क्षेत्रमा प्रवेश गरे । उनीहरु झनै आक्रोशित भए र नारा लगाउनसमेत भ्याए । धन्न प्रदर्शनकारीको आक्रोश कालोमोसो सम्म पुगेन् । दुवै वडाध्यक्षले काम सुचारु गर्ने र वैकल्पिक बाटो बनाउने भनेपछि भिड शान्त भएको थियो । १५ महिनामा बनाउने सम्झौता भएको पुल २५ महिना बित्दासम्म पिल्लरमात्र ठड्याउने काम भएकाले उनीहरुको आक्रोश सडकसम्म पुगेको हो ।
पटक पटक वडा र महानगरमा जानकारी गराउँदासमेत सुनुवाई नभएपछि बाध्य भएर सडक तताउनु परेको एक व्यवसायीले बताए । पोखरा महानगरपालिका वडा नम्बर ४ र ५ जोड्ने फिर्के खोलामाथि बन्न लागेको पुल समयमै नभएको भन्दै स्थानीयले विरोध गरेका हुन् । उनीहरुले सिद्धार्थचोक, चिप्लेढुंगा रामकृष्णटोल र बगालेटोलमा चक्काजाम गरेका थिए । चाडपर्व नजिकिँदै गएको तर मानिस आवतजावत गर्ने बाटो नै बन्द भएपछि आफूहरु ठूलो मारमा परेको स्थानीय कृष्ण पराजुली (ढाकामोहन) ले जानकारी दिए । पुल छिटो निर्माण गर्नुपर्ने र कम्तीमा दुईपांग्रे सवारी चल्ने वैकल्पिक बाटो बनाइदिनुपर्ने आफूहरुको माग रहेको उनले बताए । लामो समय कोरोना कहरपछि बजार खुले पनि पुल निर्माण नहुँदा व्यापार हुन नसकेको सिद्धार्थ व्यवसाय संघर्ष समितिका विनोद लामिछानेले बताए । जसले गर्दा भाडासम्म तिर्न सक्ने अवस्था नरहेको उनको भनाइ थियो । आफूहरुको अन्य विकल्प केही नभएकाले बाध्य भएर संघर्षका कार्यक्रम अघि बढाउनुपरेको लामिछानेले बताए ।
स्थानीयकै विरोधले २३ बाट १७ मिटरमा झारिएको छ, १५ महिनामा बनाउने सम्झौता भए पनि २५ महिना बित्दासम्म पिल्लरमात्रै
आइतबार उनीहरुको विरोध भएको केही घन्टामै डोजर चलाएर काम सुरु गरिएको थियो । तर फेरि स्थानीयले केही समय अवरोध गरे । आफूहरुको दबाबपछि काम सुरु गरे पनि केही घन्टा काम गरेर डोजर बिग्रयो भनेर काम बन्द गरकाले समयमै सकिन्छ भन्नेमा शंका रहेको स्थानीय पराजुलीले बताए ।
स्थानीयको जग्गा मिचिएको भन्दै जोडर चलाउन अवरोध गरेको वडाध्यक्ष शंकरप्रसाद बास्तोलाले बताए । पुल ढिलो भयो भन्ने पनि स्थानीय र पुल बनाउँदा अवरोध गर्ने पनि स्थानीय नै भएका कारण समस्या परेको उनले बताए । स्थानियको दोहोरो चरित्रले झनै गाह्रो बनाएको उनको भनाई थियो । बाटो, व्यक्तिगत जग्गा आदि सबै मिलाउँदा ३ महिना बितेको वडाध्यक्ष बास्तोलाले जनाए । स्थानीयकै विरोधका कारण २३ मिटरको पुल रिसाइज गर्ने भन्दै १७ मिटरमा झारिएको छ । सहरी क्षेत्रमा बन्ने पुल आकर्षक बनाउने हेतुले पाइलिङ सिस्टमको पुल बनाउन लागिएका कारण पनि केही ढिलाइ भएको उनी स्वीकार्छन् । ‘पोखरामा यो नयाँ सिस्टम अनुभव भएकाले सुरुका दिनमा महानगर र निर्माण कम्पनी सोयल टेस्टमा अलमलमा परेको थियो’, उनले भने, ‘सोयल टेस्टलगायत अन्य कारण काममा ढिलो भएकै थियो पछि विवाद आयो अनि कोरोनाले काम ढिलाइ भयो ।’ स्थानीयको चासो, चिन्ता र दबाबसहित विवाद नगर्ने सहमतिपछि काम धमाधम अघि बढ्ने अध्यक्ष बास्तोलाले बताए ।
सानेपाको शान्ति÷आरोग्य जेभी ४ करोड ५५ लाखमा २०७६ भदौ १ गते सम्झौता गरेको पुल २०७७ मंसिर ५ गते सकिनुपर्ने हो । तर विविध कारणले ढिलाइ भएको निर्माण कम्पनीका इन्जिनियर रामनारायण यादवले बताए । ‘सुरुमा वडा नम्बर ५ तर्फको बाटो विवाद भयो,’ उनले भने, ‘पछि ४ नम्बर वडा तर्फ व्यक्तिगत जग्गाले विवादका कारण र कोरोनाले पनि काममा बाधा पु¥याएको हो ।’ पस्र्याङतर्फको बाटो विवाद सकिएको र सिद्धार्थचोक तर्फको जग्गा विवाद नहुने हो भने अबको ५ महिनामा काम सक्ने इ यादवले जानकारी दिए ।
Related News
सम्बन्धित समाचार
जिभिपी युके लन्डनलाई भलिबल उपाधि
एचआइभी संक्रमणले पढाइबाट वञ्चित
हातपात अभियोगमा पक्राउ
तमु धिंको ४० औं स्थापना दिवसमा गण्डकीका मन्त्रीहरुको सम्मान
उषा र प्रकाश पोखरा साइकल दौड च्याम्पियन
hero news full width
मुख्य समाचार
पोखरा सिँगार्न दिनहुँ श्रमदानमा खटिन्छन् सीताराम
मुग्लिन–पोखरा सडक पूर्वी खण्डको म्याद थपियो
जेठ ४, २०८१फेवाको मापदण्ड घटाउन सर्वोच्चमा रिट
जेठ ४, २०८१सहकारीका विकृति राजनीतिकर्मीका लागि चुनौती : मुख्यमन्त्री अधिकारी
जेठ ४, २०८१पर्वत र बागलुङका सिडिओ फेरिए
जेठ ४, २०८१जनप्रिय क्याम्पस प्रमुखमा रमेशबहादुर खड्का
जेठ ४, २०८१