पोखरा। नेपाल नागरिक उडड्यन प्राधिकरण, पोखरा कार्यालयका निर्देशक विक्रमराज गौतमले बुधबार एक कार्यक्रममा सन् २०२२ जनवरीबाट घरेलु उडानसँगै पोखरा अन्तर्राष्ट्रिय विमास्थल सञ्चालन गर्ने बताए । उनको भनाइअनुसार विमानस्थल सञ्चालनमा आउन ९० दिनमात्र बाँकी छ । सञ्चारमाध्यममा आएको समाचारले धेरैको ध्यानाकर्षण गरायो । त्यही क्रममा शुक्रबार पश्चिमाञ्चल होटल संघ, पोखराले ‘पोखरा अन्तर्राष्ट्रिय विमानस्थल र हाम्रो सरोकार’ विषयमा अन्तक्र्रिया आयोजना ग¥यो ।

अन्तक्र्रियाका वक्ताले विमानस्थलबाट सुरुआतमा अन्तर्राष्ट्रिय उडानबाटै गर्नुपर्नेमा जोड दिए । विमानस्थल निर्माणका अभियन्ता एवं पश्चिमाञ्चल होटल संघका सल्लाहकार विश्वशंकर पालिखेले विमानस्थन शिलान्यास अघिका दिन स्मरण गर्दै अहिलेको अवस्थामा आइपुग्दा खुसी व्यक्त गरे । विभिन्न वार्ता, अनसन, नारा, जुलुस संघर्षले शिलान्यास भएको विमानस्थल अन्तिम निर्माणको उत्तरार्धमा छ । तर केही समस्या अझै रहेकोले त्यसलाई सबै मिलेर समाधान गर्नुपर्ने उनको भनाइ थियो । सबै समस्याको हल भएपछि सञ्चालन ल्याउँदा आन्तरिक नभई बाह्य उडानबाटै उद्घाटन गर्नुपर्नेमा उनको जोड थियो । जसका लागि होटल संघ र आफू सहयोग गर्न तयार रहेको उनले बताए । ‘हामी करिब सञ्चालनको मुखमा छौं तर आजसम्म हामीलाई थाहा छैन । कुनकुन देशका हवाई सेवा कम्पनीले सेवा सञ्चालन गर्छन् भनेर ?,’ उनले भने । नेपालमा सञ्चालित विभिन्न राष्ट्रका हवाई सेवा कम्पनीका कन्ट्री म्यानेजर र जिएमए कम्पनीहरुलाई नेपालमै आमन्त्रण गरेर सल्लाह गर्न आफूहरु तयार रहको पालिखेले सुनाए ।

नेपाल एसोसिएसन अफ टुर तथा ट्राभल एजेन्ट्स (नाट्टा) गण्डकी अध्यक्ष सञ्जयकान्त सिग्देलले अन्तर्राष्ट्रिय विमानस्थलबाट पहिलो फ्लाइट अन्तर्राष्ट्रिय नै हुनुपर्नेमा जोड दिए । यसका लागि सहयोग गर्न नाट्टा तयार रहेको उनले धारणा राखे । ‘अस्ति हामीले विमान बंगलादेशसँग कुरा गरेका थियौं । यसरी नै सबै एअरलायन्ससँग व्यावसायको कुरा गर्छौं,’ सिग्देलले भने, ‘त्यसपछि हामीहरुले सरकारसँग उहाँहरुलाई लिएर आउँछौं ।’ यसका लागि ३ तहका सरकार र सबै निजी क्षेत्रले प्रयास गर्नुपर्ने बताए ।

ट्रेकिङ एसोसियसन अफ नेपाल (टान), गण्डकी अध्यक्ष सुशीलराज पौडेलले घरेलु उडान भएमा अन्तर्राष्ट्रिय विमानस्थलको औचित्य नरहने बताए । ‘यहाँहरुले भनेजस्तै धेरै टेक्निकल पाटो बनिसकेका छन् । अब अन्तर्राष्ट्रियजगत्मा उड्ने भयो भने ठूलो आशा बोकेर आएका थियौं,’ उनले भने, ‘तर टेक्निकल पार्टका कुरा सुन्दा अझै १ वर्ष लाग्ने रहेछ भन्ने भयो ।’ घरेलु उडान गर्ने भनेर घोषणा गर्न हतार गरेको उनको आरोप थियो । आन्तरिक उडान गर्ने भनेर घोषणा गर्दैमा अन्तर्राष्ट्रिय विमानस्थलले सार्थकता नपाउने उनले बताए ।
यस्तै वक्ताले ल्यान्डफिल साइड स्थानान्तरण, रिठ्ठेपानी डाँडा कटान, रिङरोड, वरिपरि बस्तीका बासिन्दाका समस्यासँगै ढल निकास र सिंचाइ प्रबन्ध छिटोभन्दा छिटो हुनुपर्नेमा जोड दिए ।

विमानस्थल सञ्चालनपछि हाल सञ्चालित पुरानो विमानस्थलको प्रयोग र प्रयोजनबारे पनि छलफल भएको थियो । पोखरा पर्यटन परिषद्का उपाध्यक्ष पोमनारायण श्रेष्ठले पुरानो विमानस्थललाई पाइलट ट्रेनिङ सेन्टर बनाउन पनि सुझाव दिए ।

अन्तर्राष्ट्रिय उडानका लागि अन्य देशको उडान कम्पनीहरुसँग बसेर सल्लाह गर्नुपर्छ : मुख्यमन्त्री पोखरेल

सबैको कुरा सुनिसकेपछि गण्डकी प्रदेशका मुख्यमन्त्री कृष्णचन्द्र नेपाली पोखरेलले अन्तर्राष्ट्रिय विमानस्थलको सन्देश अन्तर्राष्ट्रिय उडान गरेर दिने बताए । ‘मेरो पनि उद्देश्य भनेको इन्टरनेसनल फ्लाइट गराएरै सन्देश दिने हो,’ उनले भने, ‘किनभने डोमेस्टिक त हाम्रो चलेकै अवस्था छ नि ।’ अन्तर्राष्ट्रिय उडानका लागि प्राविधिक, ल्यान्डफिल स्थानान्तरण, पानीको समस्या समाधानका लागि केन्द्रीय सरकारसँग सहकार्य गर्ने उनले बताए । रिठ्ठेपानी डाँडा कटान विषयमा कानुनी व्यवधान हटाउन सबै मिलेर जानुपर्ने उनको भनाइ थियो । अन्तर्राष्ट्रिय उडानका लागि अन्य देशको उडान कम्पनीहरुसँग बसेर सल्लाह गर्नुपर्नेमा जोड दिए ।

पोखरा महानगरपालिका सरसफाइ शाखा प्रमुख कल्पना बरालले ल्यान्डफिल साइडको काम भए पनि केही ढिला भएको बताइन् । जग्गा प्राप्ति र आर्थिक व्यवस्थापन कारण काममा ढिलाइ भएको उनी बताउँछिन् । हालको ल्यान्डफिल साइडमा धेरै प्रकारका फोहोर फालिने भएकाले कस्ता फोहोर फाल्ने ? कस्ता नफाल्ने ? विषयमा नागरिक उडड्यन प्राधिकरणलाई पत्र पठाएको उनले जानकारी दिइन् । चालु आवबाट वडाध्यक्ष जीवन आचार्यको संयोजकत्वमा बनेको समितिले पनि काम गरिरहेकाले केही समयमा ल्यान्डफिल साइडको समस्या समाधान हुने उनी बताउँछन् । कार्यक्रममा सहभागी राजनीतिक दलका प्रतिनिधिले पनि पहिले स्थानीयको समस्या समाधान गर्दै विमानस्थलसँग सम्बन्धित भौतिक संरचना बनाउनु पर्नेमा जोड दिए ।

आवश्यक विधि र प्रक्रिया पूरा गरी चिनियाँ सिएएमसिई इन्जिनियरिङ कम्पनीलाई नेपाल सरकारले निर्माणको जिम्मा दिएको हो । अन्तर्राष्ट्रिय नागरिक उड्डयन संगठन (आईकाओ) मापदण्डअनुसार फोरडी मोडलमा सन् २०१७ नोभेम्बरदेखि निर्माण थालिएको थियो । नेपालले चिनियाँ सरकारसँग २२ अर्ब रुपैयाँ ऋण लिएर निर्माण थालिएको यो विमानस्थल त्रिभुवन अन्तर्राष्ट्रिय विमानस्थलको विकल्परुपमा हेरिएको छ ।

विमानस्थल स्थानान्तरण तथा सञ्चालन तयारी गर्न गठित कार्यदलका संयोजकसमेत रहेका विक्रमराज गौतमले आगामी २०२२ जनवरी १ देखि आन्तरिक उडान र २०७९ वैशाखदेखि अन्तर्राष्ट्रिय उडान खुला गर्न नागरिक उड्डयन प्राधिकरणलाई सिफारिस गरिसकेको बताएका छन् । विमानस्थल बनेपछि दैनिक आन्तरिक ४८ र अन्तर्राष्ट्रिय ६ वटा उडान हुने गरी नागरिक उड्डयन प्राधिकरणले तयारी थालेको छ । विमानस्थलमा ११ वटासम्म जहाज पार्किङ गर्न मिल्छ । २ हजार ५ सय मिटर लामो धावनमार्गको यो विमानस्थलमा उडान वा अवतरित हुने विमानको यात्रु क्षमता झण्डै २ हजार जनाको हुने विमानस्थल आयोजना प्रमुख विनेश मुनंकर्मीले बताए । विमानस्थल सञ्चालन आएपछि पोखरामात्र नभै समग्र नेपालकै पर्यटन क्षेत्रले फड्को मार्ने देखिन्छ ।