पोखरा । महिला महिनावारी हुँदा लगाउने स्यानिटरी प्याडमा लगाएको करविरुद्ध युथ कांग्रेस नेपाल कास्कीले शनिबार पोखरामा विरोध प्रदर्शन गरेको छ ।

सरकारले सेनिटरी प्याडमा लागेको ‘रातो कर खारेज गर’ भन्दै पोखराको चिप्लेढुंगास्थित मानवअधिकार चोकमा युवायुवतीले सांकेतिक विरोध प्रदर्शन गरेका हुन् ।
निशुल्क वितरण गर्नुपर्ने प्याडलाई उल्टै कर लगाउने कामले स्वास्थ्य माफियालाई अझ हौसला मिल्ने र प्याड जस्तो सम्वेदनशील वस्तुमा कर छुट नगरेमा कडा आन्दोलनमा उत्रने उनीहरुले चेतावनी दिए ।

उनीहरुले महिनावारी सम्बन्धी सम्पूर्ण सामग्रीहरुमा लाग्ने गरेको हरेक प्रकारको कर हटाउनुपर्ने, महिलाहरुको सहज पहुँचमा पुग्ने गरी सामग्रीहरुको व्यवस्थापन गर्न माग गरेका थिए ।
उनीहरुले अन्य दलहरुको भन्दा फरक प्रकृतिले एक घन्टा विरोध प्रर्दशन गरेका हुन् । प्रर्दशनकाक्रममा महिलामा हुने समस्याबारे डेमो प्रस्तुत गरेका थिए ।

कार्यक्रममा सुशांक पराजुली, मोनिका बुढाथोकी, श्रृजा पौडेल, रेबिना खड्का लगायतले महिलालाई निशुल्क वितरण गर्नुपर्ने सामग्रीमा कर लगाएर महिलाको अपमान गरेको बताएका थिए ।