पोखरा । पोखरा महानगरपालिका न्यायिक समितिको आयोजना र महिला कानून र विकास मञ्चको सहयोगमा कानुनी पहिचान (नागरिकता र जन्म दर्ता) सम्बन्धमा अन्तक्र्रियात्मक छलफल कार्यक्रम भएको छ ।
महानगर उपप्रमुख मञ्जुदेवी गुरुङले समयमै घटना दर्ता समयमै नगर्दा नागरिकले समस्या भोग्नु परेको बताउँदै विवाह,जन्म, मृत्यु दर्ता र नागरिकता समयमै बनाउन सुझाव दिइन् । उनले महानगरवासीलाई समयमै विवाह, जन्म, मृत्यु दर्ता गराउन सचेतना आवश्यक रहेको पनि बताइन् ।
उनले हाल संसद्मा पेस नागरिकता विधेयकमा सिफारिस गर्ने वडाध्यक्षलाई समेत कारबाही हुने व्यवस्था संशोधनका लागि आवाज उठाउन सुझावसमेत दिइन् ।
उनले न्यायिक समितिमा मानाचामल, ज्येष्ठ नागरिकको लालनपालन, सम्बन्ध विच्छेद लगायका मुद्दा बढी आउने गरेको उल्लेख गर्दै न्यायिक समिति संवैधानिक व्यवस्था भएकाले यसको निर्णय कार्यान्वयन बाध्यकारी हुने बताइन् । अधिवक्ता सविन श्रेष्ठले जन्मदाता र नागरिकतासम्बन्धी कानुनी व्यवस्था, सजाय लगायतबारे सहजीकरण गरे ।
उपप्रमुख गुरुङको अध्यक्षतामा भएको कार्यक्रममा महानगर न्यायिक समिति सदस्य किशोर बरालले स्वागत र कल्पना ढकालले सञ्चालन गरेकी थिइन् । कार्यक्रममा पोखरा महानगरका ३३ वटै वडाका वडाध्यक्ष र कार्यपालिका सदस्यको प्रतिनिधित्व थियो ।