पोखरा । इन्डियन प्रिमियर लिग (आईपीएल) टी–ट्वान्टी क्रिकेट आज (शनिबार) बाट सुरु हुँदैछ ।

१३ औं संस्करणको आईपीएल आजबाट यूएईमा सुरु हुन लागेको हो । युएईको अबुधाबीमा हुने सिजनको पहिलो (उद्घाटन) खेलमा साविक विजेता मुम्बई इन्डियन्स र उपविजेता चेन्नई सुपर किङ्सबीच प्रतिस्पर्धा हुनेछ ।

दुई टोलीबीचको खेल नेपाली समय अनुसार साँझ ७ः४५ बजे सुरु हुनेछ । उद्घाटन खेलमा दुबै टोली जित निकाल्दै सिजनको सुखद सुरुआत गर्ने योजनामा हुनेछ ।

शेख जायद स्टेडियममा प्रतियोगिताको पहिलो खेल खेल्दा मुम्बई सिजनको सुखद सुरुआत गर्ने योजनामा हुनेछ । रोहित शर्माको कप्तानीमा मैदान उत्रने मुम्बईले यो सिजन पनि लिगको उपाधि जित्ने योजना बनाएको छ ।

यता महेन्द्र सिंह धोनीको कप्तानीमा मैदान उत्रने चेन्नई उद्घाटन खेलमा जित निकाल्दै गत सिजन फाइलनमा हार व्यहोरेको बदला लिने योजनामा छ ।

मुम्बई र चेन्नइबीचको पछिल्लो ५ खेलको नतिजा हेर्दा मुम्बई अपराजित रहेको छ । गत सिजनको फाइनल खेलमा पनि मुम्बईले चेनईविरुद्ध १ रनको रोमाञ्चक जित दर्ता गरेको थियो ।