लेखनाथ  । अविरल वर्षपछि पोखरा ३२, सुकुम्वासी टोल नंं ६ मा खुँदीखोलामा आएको बाढीले दुई घर बगाएको छ ।

बाढीले स्थानीय सूर्यबहादुर नेपाली र सञ्चमाया मोक्तानको घरबारी, अन्नवाली बगाएको हो ।

सुतिरहेको अवस्थामा गएराति करिब १२ बजेतिर नेपालीको घर बाढीले बगाउँदा करिब ३ लाख बरावरको क्षति र मोक्तानको २ लाख बरावरको क्षति भएको पीडितले जनाएका छन् । घटनामा मानवीय क्षति भने टरेको छ ।

घर बाढीले बगाएपछि नेपाली र मोक्तान परिवारलाई स्थानीयको सहयोगमा नजिकैको आधारभूत आराधना प्राथमिक विद्यालयमा राखिएको जानकारी वडाध्यक्ष अक्कलबहादुर कार्कीले दिए ।

यस्तै निरन्तरको वर्षापछि आएको बाढी पहिरोका कारण सोही ठाउँका अस्मिता बिक र बुद्धिमाया नेपालीको घर र खेतीयोग्य जमिन समेत जोखिममा परेका छन् ।

बाढीले नेपालीको घरका सामान भाँडाकुडा, लत्ताकपडा समेत बगाएको साथै छिमेकीको भने घरमात्र बगाएको हो ।

यस्तै, गगनगौँडा र सातमुहाने जोड्ने खुँदीखोलाको कल्भर्ट समेत पूर्ण रुपमा क्षति भएको छ ।

वर्षाका कारण वडा ३० मा रहेको प्रदेश ट्राफिक प्रहरी कार्यालयको परिसरमा रहेको करिब १ सय मिटर पर्खाल समेत भत्किएकोे पोखरा–३० का वडाध्यक्ष श्रीराम पोखरेलले जानकारी दिए ।