पोखरा । कोरोना भाइरसको प्रभावका कारण विषम परिस्थितिबीच चलचित्र पत्रकार संघ कास्कीले पोखरामा सोमबार रक्तदान कार्यक्रम आयोजना गर्‍यो ।

पोखरा सभागृहस्थित मिड टाउन परिसरमा भएको कार्यक्रममा ३५ युनिट रगत संकलन भयो ।

संघका अध्यक्ष अरुण गिरीले रक्तदान गर्दै कार्यक्रम उद्घाटन गरेका थिए । गिरीले संघले कोरोना महामारीका कारण कास्कीमा देखा परेको रक्तअभाव पूर्ति गर्न कार्यक्रमको आयोजना गरिएको बताए ।

उनले चलचित्र क्षेत्रसँग सम्बन्धित कार्यक्रम सहित केही मानवीय सेवामूलक कार्यक्रम गर्न चाहेकोमा आज पूरा भएको बताए । उनले आगामी दिनमा पनि यस्तै कार्यक्रमलाई निरन्तरता दिने बताए ।

क्षेत्रीय रक्तसञ्चार केन्द्र पोखराका प्रमुख अर्जुन ज्ञवालीले संघ यसरी मानवीय सेवामा समर्पित भएको देख्दा खुसी लागेको बताए ।

संघका निर्वतमान अध्यक्ष रेम विकले संघको पछिल्लो गतिविधि प्रशंसनीय रहेको भन्दै संघको प्रगतिको कामना गरे ।

चलचित्र निर्देशक घनश्याम लामिछानेले कोरोना कहरबीच सामाजिक उत्तरदायित्वअन्तर्गत मानवीय सेवामा जुट्नु आफैमा प्रशंसनीय भएको बताए ।

कार्यक्रममा चलचित्र क्षेत्रमा आबद्ध रहेका कलाकार, पत्रकार लगायतको उपस्थिति रहेको संघका सचिव प्रभू अधिकारीले जानकारी दिए ।

कार्यक्रम क्षेत्रीय रक्तसञ्चार केन्द्रको प्राविधिक सहयोगमा भएको हो ।