दमौली, २२ भदौ । तनहुँको ऋषिङ गाउँपालिका–१ देउलीखोलामा जीप दुर्घटनामा परी २ जनाको मृत्यु भएको छ । दुर्घटनामा ६ जना घाइते छन् ।

दुर्घटनामा परी मुत्यु हुनेमा चालक म्याग्दे ७ का ३२ वर्षीय होमबहादुर श्रेष्ठ र व्यास–५ का ५५ वर्षीय राजकुमार श्रेष्ठ रहेको जिल्ला प्रहरी कार्यालय तनहुँले जानकारी दिएको छ ।

जिल्ला प्रहरी कार्यालय तनहुँका प्रहरी नायब उपरीक्षक युवराज तिमिल्सेनाका अनुसार जीप चालक होमबहादुरको घटनास्थलमै र राजकुमारको दमौली अस्पतालमा उपचारको क्रममा मृत्यु भएको हो । जीपमा सवार अन्य ६ जना घाइतेमध्ये ४ जनाको पोखरामा र २ जनाको दमौली अस्पतालमा उपचार भइरहेको छ ।

व्यास–५ स्थित चापाघाटबाट आफन्तको निधनमा भेटी लिएर ऋषिङ गाउँपालिकाको खाल्डेतर्फ जाँदै गरेको ग१ज ७१२८ नम्वरको जीप कच्ची सडकबाट करिब ७० मिटर तल खोलामा खस्दा दुर्घटना भएको हो ।

घटनामा घाइते सबै व्यास ५, चापाघाटका आफन्त हुन् ।