पोखरा । नेपाली राष्ट्रिय क्रिकेट खेलाडीहरुले विगत डेढ वर्षदेखि रोकिएको तलव पाएका छन् ।

अन्तर्राष्ट्रिय क्रिकेट परिषद् (आइसीसी)ले रोकिएको तलव निकासा गरेको हो । नेपाल क्रिकेट संघ (क्यान) ले निरन्तर गरेको आग्रहमा आइसीसीले खेलाडीहरुको रोकिएको तलब निकासा गरेको हो ।

आइसीसीले खेलाडीबाहेक क्यान कर्मचारी, मुलपानी र कीर्तिपुर मैदानका कर्मचारीको बाँकी रहेको पारिश्रमिक समेत पठाएको छ ।

आइसीसीले सोमबार बेलुका एक वर्षको तलब नेपाल क्रिकेट संघ (क्यान) को खातामा पठाएको क्यानले जनाएको छ ।  निस्कासित तलव २ देखि ४ दिन भित्र नेपाल आईसक्ने क्यानले जनाएको छ ।

क्यानका अध्यक्ष चतुरबहादुर चन्दका अनुसार नेपाली टिमका २२ खेलाडी र १ जना भिडियो एनालिस्ट गरी २३ जनाको तलब पठाएको हो । खेलाडीको तलब आइसीसीले पठाएको तीन दिनमा क्यानको खातामा आइपुग्ने र त्यसपछि खेलाडीको खातामा पठाइने अध्यक्ष चन्दले जानकारी दिएका छन् ।

क्यानले दुई साताअघि आइसीसीलाई लामो समयदेखि खेलाडीहरुले तलब नपाएको र तलब बढाएर तत्काल पठाउन माग गर्दै पत्र पठाएको थियो ।

क्यानले नेपालका ए ,बी र सी श्रेणी गरी २३ जना खेलाडीहरुको हस्ताक्षर सहितको पत्र आइसीसीलाई पठाएको थियो । २०१९ का लागि ए श्रेणीको मासिक ३५ हजार, बी श्रेणीको मासिक २५ हजार र सी श्रेणीको मासिक १५ हजार रुपैयाँ तोकेको थियो ।

तर, अब क्यानको अनुरोधमा आइसीसीले सबै श्रेणीका खेलाडीहरुको पारिश्रमिकमा १० हजार बढाएर पठाएको छ ।