तनहुँ । ट्राफिक प्रहरीले व्यवहारमा परिवर्तन गरी सवारी चेकजाँच गर्दा नमस्कार अभियान सुरु गरेका छन् ।

जिल्ला ट्राफिक प्रहरी कार्यालय तनहुँले बोली–व्यवहारमा शुद्धता ल्याउन सप्ताहव्यापी सो अभियान सुरु गरेको हो ।

‘नमस्कार’ अभियानअन्तर्गत जिल्लाको प्रवेशद्वार आँबुखैरेनीदेखि कोत्रेसम्म आवत्जावत् गर्ने विभिन्न सवारीसाधन मंगलबार चेकजाँचसँगै कोरोनाविरुद्ध सचेत गराइएको थियो ।

सवारीचालक र ट्राफिक प्रहरीबीच घनिष्ट सम्बन्ध स्थापित गराउने उद्देश्यले सो कार्यक्रम गरिएको जिल्ला ट्राफिक प्रहरी कार्यालयका प्रमुख रेशमबहादुर रानाभाटले जानकारी दिए । सवारी चेकजाँचक्रममा असमझदारी, चिसोपन र वैमनस्यता हुन नदिन बोली र ब्यवहारमा परिवर्तन ल्याउनु आवश्यक रहेको महसुस गरी प्रशिक्षण सो अभियान सुरु गरिएको रानाभाटले बताए ।

‘तपाईँ, ‘हजुर’ शब्द प्रयोग गरेर सवारीचालक र ट्राफिक प्रहरीले व्यवहार गर्न सके तुरुन्तै व्यवहारमा परिवर्तन आउने स्थानीयहरुको पनि विश्वास छ ।

चेकजाँचक्रममा सवारीचालकलाई ‘नमस्ते ! तपाईं कहाँसम्मको यात्राका लागि सवार गर्नुभएको हो ?’ ‘सेनिटाइजर छ कि छैन ?’ ‘माक्स प्रयोग गरे–नगरेको हेरी ‘कोरोनाबाट बच्न तपाईँले के–कस्ता उपाय अपनाउनुभएको छ वा छैन ?’ लगायत विषयमा सोधपुछ गरी आवश्यक कागजपत्र भए–नभएको जानकारी लिएरमात्र सम्भावित कारबाही प्रक्रिया अगाडि बढाउन थालिएको छ ।

यात्राका क्रममा यात्रु र सवारीचालक कोरोना संक्रमण विषयमा सजग र सतर्क होओन् भन्ने उद्देश्यका साथ यो अभियान प्रभावकारी बन्ने ट्राफिक प्रमुख रानाभाटले बताए ।

यसैबीच, मंगलबार चेकजाँचक्रममा ५४ सवारीसाधन कारबाहीमा परेका छन् ।