पोखरा । ‘फूड फर गूड’ नाराका साथ नोभेल एकेडेमी पोखरामा डिसेम्बर पहिलो साता हुने हल्ट प्राइज–२०२०/२१ हुने भएको छ ।

विश्वभरका दुई हजारभन्दा बढी विश्वविद्यालयका विद्यार्थीले भाग लिने उक्त प्रतियोगिता हल्ट फाउन्डेसन, हल्ट इन्टरनेश्नल बिजनेस स्कुल र संयुक्त राष्ट्रसंघले संयुक्त आयोजना गर्दैछन् ।

यो प्रतिस्पर्धा विद्यार्थीका लागि नोबेल पुरस्कार भनेर चिनिने अमेरिकी १ मिलियन डलरको ग्लोबल स्टार्टअप पुरस्कार यसको मुख्य आकर्षकरूपमा रहेको क्याम्पस निर्देशक बरुण क्षत्रीले बताए ।

कार्यक्रमका लागि क्याम्पस निर्देशक क्षत्री र उपनिर्देशक मनमोहन रिमालको संयुक्त संयोजनमा आयोजक समिति समेत गठन भइसकेको छ । रिमालले आगामी कार्यक्रममा विद्यार्थीलाई आवश्यक तालिम व्यवस्था समेत क्याम्पस समितिले गर्ने जानकारी दिए ।

नोभेल एकेडेमी पोखरामा हुने सो कार्यक्रममा विश्वविद्यालयका सम्पूर्ण आंगीक तथा सम्बन्धनप्राप्त क्याम्पसमा स्नातक वा स्नातकोत्तर तहका विद्यार्थीले ३ वा ४ जनासम्मको एउटा समूह बनाई सहभागी हुन पाउनेछन् ।

पूर्वाञ्चल विश्वविद्यालयले २०१८ देखि सो प्रतियोगिता आयोजना गर्दै आएको छ । सो विश्वविद्यालयको सम्बन्धन पोखरामा प्रतिनिधित्व गर्दै यो हल्ट प्राइज पहिलो पटक यहाँ सञ्चालन हुन लागेको कार्यक्रमका सल्लाहकार एवं नोभेल एकेडेमी पोखराका प्रमुख कार्यकारी अधिकृत विश्वेश्वर आचार्यले बताए ।

कार्यक्रमलाई नोभेल एकेडेमी, नोभेल फाउण्डेसन, युनुश सोसियल बिजनेस सेन्टर, सफल आवाज डटकमले सहयोग गरेका छन् ।